chapter 3
Ande Tiberius chasaresko deshupazhto bersh, kana o Ponciush Pilatush sas la Judeako prefekto, o Herodesh pale la Galileako fertajicko kraj, haj le Lizanias Abilinako fertajicko kraj,
tala Annash haj Kaifash angrashaja, ashundyilas le Rajesko alav kaj o Janosh, le Zakariasheske shaveste ande pusta.
Haj voj gelastar sa pe Jordaneske intrega riga, viacarelas le bezexbunuimatango bolipe pe bezexjertimata,
sar iskirime si ande Izajash profetaske vorbimatenge hertija:
„Ande pusta cipisareski vorba:
»Lasharen le Rajesko drom,
Keren vortaske leske droma!«
Sakone xara andre pherdyarena,
sakone plajen haj uchimata phiravena;
so bangoj, avri vortardyola, o drom bi glontosardyola:
haj dikhela sako trupo le Devlesko muntusardyipe«”.
Kade das duma apol kaj e butimata, save avrigeline, te bolardyol leste: „Sapenge falura! Kon sityardas tumen te nashentar angla e avlimataski xolyi?
Upajin kaj o Del boldyimaske fruktura, haj na phenen ande tumende: »O Abraham si amaro dad«. Ke phenav tumenge: O Del zhanel vi anda kadal barr shaven te kerel le Abrahameske.
O tover aba pe kashtengi rikita pashjol. Sakone kashtes, savo chi anla lasho frukto, avri shinena haj pe jag shudena.”
Atunchi pushlas les o butipe: „So te keras atunchi?”
Voj kado phendas lenge: „Kas duj gada si, te ulavelle kodalesa, kas naj: haj kas xamasko si, zhikade te kerel.”
Kothe aviline vi le financura, te bolardyon, haj pushline les: „Maistro! So te keras?”
Voj kado phendas lenge: „Khanchi na mangen pe kodo opral, so angle si iskirime tumenge.”
Pushline les vi le ketani: „Haj ame so te keras?” Kodo phendas lenge: „Khanyikas na azban, na daraven, haj t«avel dosta tumenge tumaro potyinipe.”
E butimata feri zhukarelas, haj sakon pushelaspes ande pesko ilo pa Janosh, dore na voj si o Kristo?
O Janosh kado phendas savorazhenenge: „Me numa pajesa bolav tumen. Ba avla, kon majzuraloj mandar, kaske chi som dosta changadines chi leske sandalenge haravja te putrav. Voj le Sunto Duhosa haj jagasa bolela tumen.
Leske rispisardi lapata aba ande lesko vast si, haj uzharel peski bar. Kethane kidel o dyiv ando sino, le patra pale bi shaj mudarde jagasa phabarela.”
Inke pe but sakofaloste ferisarlas le manushen, haj sityarelas lenge o evangeliumo.
O Herodesh pale, o fertajicko kraj, kas tele phendas anda Herodiash, anda leske phraleski romnyi, haj anda leske sakone nasulimata, so o Herodesh kerdas,
haj kadal inke vi butardas kodolesa, ke le Janoshes ande robija phandadas.
Pecisardyilas apol, ke kana aba le intrega manusha boladepe, vi o Jezush boladaspe. Sar rudyilas, puterdyilas o cheri,
haj sar jekh gulunbo pe leste hurajlas o Sunto Duho, haj kado glaso ashundyilas anda cheri: „Tu san muro kamado shavo, ande tute pherdyol muri voja”.
O Jezush, kana las te sityarel, karing tranda bersh phirelas. Le Jozhefesko shavo sas, sar zhanenas, voj pale le Heliesko, voj le Mattatesko,
voj le Levesko, voj le Melkiesko, voj le Jannajesko, voj le Jozhefesko,
voj le Mattitaesko, voj le Amosesko, voj le Nuhumesko, voj le Hesliesko, voj le Naggaesko,
voj le Maatesko, voj le Mattitjasko, voj le Shimiesko, voj le Josehesko, voj le Jodaesko,
voj le Johananesko, voj le Resaesko, voj le Zerubbabelesko, voj le Sealtielesko, voj le, Neriesko,
voj le Melkiesko, voj le Addiesko, voj le Kosamesko, voj le Elmadamesko, voj le Heresko,
voj le Jozhuesko, voj le Eliezeresko, voj le Jorimesko, voj le Mattatesko, voj le Leviesko,
voj le Shimeonesko, voj le Judaesko, voj le Jo-zhefesko, voj le Jonamesko, voj le Eljakimesko,
voj le Meleaesko, voj le Mennaesko, voj le Mattataesko, voj le Natanesko, voj le Davidesko,
voj le Izajesko, voj le Obedesko, voj le Bo¢zesko, voj le Salmonesko, voj le Nahsonesko,
voj le Aminadabesko, voj le Adminesko, voj le Aramesko, voj le Ezronesko, voj le Faresesko, voj le Judaesko,
Jakobesko, voj le Izhakesko, voj le Abrahamesko, voj le Terahesko, voj le Nahoresko,
voj le Serugesko, voj le Reguesko, voj le Pelegesko, voj le Heberesko, voj le Selahesko,
voj le Kenanesko, voj le Arfaxadesko, voj le Semesko, voj le Noeesko, voj le Lamekesko,
voj le Matuzhalemesko, voj le Henokesko, voj le Jaredesko, voj le Mahalalelesko, voj le Kenanesko,
voj le Enosesko, voj le Setesko, voj le Adamesko, voj le Devlesko.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly