Evangeliumo kathar o Mate
capítulo 14
Le Herodeshesko phenipe pa Jezush
verso 1
Ande kodal vrami o Herodesh fertajicko kraj ashundas viaca pa Jezush,
verso 2
haj kodo phendas peske slugange: „Kado o Bolari Janosh si. Voj trajisardas opre anda meripe, anda kodo zhanel chudimata te kerel.”
Le Bolare Janoshesko shero tele shinen
verso 3
Ke o Herodesh xutyiladas le Janoshes, phanglasles haj ande robija shudas les anda Herodiash, kon leske phraleske, le Filipeske sas romnyi.
verso 4
Ke o Janosh kodo phendas leske: „Naj muklo tuke, ke voj tyiro te avel.”
verso 5
Kamlas voj te mudarel les, ba daralas kathar le manusha, ke profetaske inkrenas les.
verso 6
Kana le Herodesheske lesko arakhadyimasko dyes sas, la Herodiashaki shej avri tordyilas mashkarutnes haj las te khelel. Po fajlipo sas kado le Herodesheske,
verso 7
anda kado colaxasa manglas la, ke dela lake sakofalo, shaj mangel zhiso.
verso 8
Ba ke laki dej aba anglalutnes avri sityardas la, kade das duma: „De mange kathe pekh tejari le Bolare Janoshesko shero.”
verso 9
O kraj brigaslo kerdyilas, ba anda colax haj andaj manusha, kon kaj e mesalya beshenas vladisardas, te den lake kothe.
verso 10
Bishaladas haj tele shinadas le Janoshesko shero ande robija.
verso 11
Lesko shero kothe ingerdine pekh tejari haj kothe dineles la shake, kodi pale kothe ingerdas les peska dake.
verso 12
Leske sityarde xutyildine o mulikano trupos haj praxosardine les, pala kodo gelinetar haj viacarde kadi traba le Jezusheske.
O angluno manresko butaripe
verso 13
Kana o Jezush ashundas kado, palpale gelas kothar pekh bero, kaj jekh pusto than, korkoro. E butimata avri zhanglas kado haj zhanas pala leste andaj forura.
verso 14
Kana avri hulyilas, dikhlas le bute manushen. Sunusardyilas pe lende lesko ilo, haj kon mashkar lende nasvalo sas sastyardas len.
verso 15
Kana ratyi kerdyilas, kothe geline leste leske sityarde haj kodo phendine leske: „Pustoj kado than haj vi e vrama nachilastar aba. Bishal le bute manushen te zhantar ande gava haj te kinen penge xamasko.”
verso 16
Ba o Jezush kado phendas lenge palpale: „Naj anda soste te zhantar, denle tume te xan.”
verso 17
Kodal kado phendine leske: „Naj amen kathe kaver, feri panzh manre thaj duj mashe.”
verso 18
Kodo phendas lenge: „Anen kathe kodolen.”
verso 19
Vladisardas le bute manushenge, ke te beshen tele, pala kodo xutyildas le panzhe manren haj le duje mashen, opredikhlas po cheri, ashtyilipe phendas, phaglas le manren haj kothe dasle peske sityardenge, le sityarde pale le butimatange.
verso 20
Savorezhene xaline haj chalyiline. Pala kodo opre kidine so ashilas anda xamasko, so ande deshuduj pherde koshnyici resline andre.
verso 21
Karing le panzh miji manusha sas, kon xaline, le romnyan haj le shavoren na ginades.
O Jezush po paji phirel
verso 22
Pala kodo sigo vladisardas le sityardenge, te hulyen ando bero, haj te zhantar angla leste pe kaver dolma perdal, zhikaj voj bishalel le butimatan.
verso 23
Pala soste bishaldas le manushen korkoro opre gelas po plaj te rudyil. Kana andre ratyilas korkoro sas kothe.
verso 24
O bero aba bute shtadiumo dur sas aba kathar e dolma, haj opre-tele shudenasles le plemeni, ke mosestar phurdelas e balval.
verso 25
Ratyi apol, kana avilastar e vrama, kana le ketani po shtarto den perdar o samalelaripe jekhavreske, kothe gelas lende pe mara phirindes.
verso 26
Kana le sityarde dikhline les, sar pe mara phirel, zurales darajline haj kado phendine: „Dichimataj!”, haj kathar e bari dar line te cipin.
verso 27
Ba o Jezush atunchi duma das lende: „Patyan, me som, na daran!”
verso 28
O Peter kade das leske vorba palpale: „Raja, tu te san, vladisar, te zhav tute po paji.”
verso 29
Voj kodo phendas: „Av!” O Peter avri hulyilas anda bero, haj las te zhal karing o Jezush po paji.
verso 30
Ba kana dikhlas e zurali balval, darajlas, haj sar las tele te muklyadyol ando paji, opre cipisardas: „Raja! Muntusar man!”
verso 31
O Jezush atunchi avri lunzhardas pesko vast, xutyildas les haj kodo phendas leske: „Tu cerra patyamnesko! Sostar chi patyajlan?”
verso 32
Kana andre hulyiline ando bero, tordyilas e balval.
verso 33
Kon ando bero sasle tele burdosajline angla leste, haj kodo phendine: „Chachikanes le Devlesko shavo san!”
Sastyarimata pe Genezareteske phuva
verso 34
Kana perdal nakhline po sarovo, perdal resline pe Genezareteske phuva.
verso 35
Kana kodale thaneske manusha opre pinzhardine les, sakoneske duma dine pe kodal riga, haj kade kothe andine leste sakone nasvales,
verso 36
haj mangenas les, ke numa kaj leske gadengo agor te shaj resen. Kon numa leste reslas, sastyilas.
Libros
