Le Romaivonge iskirisardo lil
2. fejezet
O manush angla Devlesko krisaripe
1. vers
Naj apol muntuipe pe tyi rig, zhikon te aves, tu manush, kon krisares; ke kodales, ke kaveres krisares, tut krisares, ke tu, kon krisares, zhikasave keres.
2. vers
Apol zhanas, ke le Devlesko krisaripe chachikanes resel kodalen, kon kasave keren.
3. vers
Bake kodo gindisares, tu manush, ke skepisardyos angla Devlesko krisaripe, kana kodo keres, anda soste krisares kaveren, kon kasave keren?
4. vers
Bake tele dikhes lesko lashipesko, toleranshipesko haj lunges muklimasko barvalipe, haj chi hatyares, ke le Devlesko lashipe po bezex bunuipe ingrel?
5. vers
Apol anda tyo bi muklipe haj capeno ilo xolyi vazdes pe tute, pe la xolyako dyes, kana le Devlesko chacho krisaripe sikadyol,
6. vers
haj maj voj potyinela sakoneske sar so perelpe:
7. vers
sagutne trajosa kodalenge, kon ande lashe kerde trabengo avri inkripe luvudyipe, patyiv haj bi meripe roden,
8. vers
xolyasa haj bladopesa le xapengirenge haj kodalenge, kon chi muken pen le chachipeske, ba le nasulipeske patyan.
9. vers
Dukh haj kino avla kodo sakone manusheske, kon nasulipe kerel, anglunes le biboldeske, pala kodo le hellenoske;
10. vers
ba luvudyipe haj pacha sakoneske, kon lashipe kerel, anglunes le biboldeske, pala kodo le hellenoske.
11. vers
Ke kaj o Del naj manushesko alosaripe.
Le murtikane haj e kris
12. vers
Ke sa kodola, kon bi krisako sile haj bezexaren, xasajven vi bi krisako; sa kodola pale, kon tala e kris bezexaren, kathar e kris krisarena len,
13. vers
ke na kodal si chache angla o Del, kon la krisa ashunen, ba la krisa andre inkerde resena o chachardyipe.
14. vers
Ke le murtikana, chaches ke kris najle, kathar e luma hatyardines keren sa kodo, so ande kris si, haj ke kris najle, von si penge e kris,
15. vers
haj kade sikaven, ke pala kris zhalipe ande lengo ilo si iskirime. Lengo duhosko hatyaripe shol lenge pa kado chacharipe, haj lenge gindimata, save si kana dosharel len, haj si kana opre muntun len
16. vers
pe kodo dyes, kana o Del krisarela perdal pa Jezush Kristo pa manushenge garade trabi kathar muro evangeliumo.
Le bibolde haj e kris
17. vers
Kana apol biboldo si tyo anav, haj pacha arakhes ande kris, haj tyo asharipe si o Del,
18. vers
pinzhares lesko kamipe, oprepinzhares le majlashes, ke perdal pa kris sityaripe lan,
19. vers
haj kodo hatyares, ke le korrengo anglalari, haj ande tunyarikipe silenge fimlalimata,
20. vers
le dilengo sityari, le cinenge barari te san, kon lan anda kris o zhanipe haj o chachipe:
21. vers
apol tu, kaveres sityares, tut chi sityares? Kon kavereske viacares, ke naj slobodo te choren, tu chores?
22. vers
Kon kodo phenes, ke naj slobodo te marhinpe, tu maris? Kon rucis le fetishon, khangerango choripe keres?
23. vers
Kon phutyares tut la krisasa, la krisake oprephaglimatasa marhis le Devles?
24. vers
„Anda tumende kushen le Devlesko anav mashkar le murtikana”, sar so iskirime si.
25. vers
O krujalshinpe lasho si apol, kana e kris andre inkres, ba kana la krisa opre phages, tyo krujalshinipe bi krujalshinipeske kerdyol.
26. vers
Ba kana o bi krujalshindo andre inkrel la krisake chachimata, chi inkerdyol krujalshinimaske lesko bi krujalshinipe?
27. vers
Haj kodo, kon kathar e luma bi krujalshindo si, kana andre inkrel la krisa, krisarela tut, kon pasha o Iskiripe haj krujalshinipe la krisako oprephagari san.
28. vers
Ke na kodoj o biboldo kon avral kodoj, haj na kodo si o krujalshinipe, so avral po trupo shaj dikhen,
29. vers
ba kodo si o biboldo, kon andral si kodo. Kado si le ilesko krujalshinipe kathar o duho haj na kathar iskiripe: kodo, kon na kathar le manusha lel asharipe, ba kathar o Del.
Könyvek
