Evangeliumo kathar o Janosh
capítulo 12
O betanicko makhlipe
verso 1
Angla Patradyi shove dyesenca o Jezush ande Betania gelas, kaj o Lazar beshelas, kas o Jezush opretrajardas anda meripe.
verso 2
Kothe xamo kerdine leske. E Marta opreslugisardas, o Lazar pale mashkar kodal sas, kon lesa beshenas kaj e mesalya.
verso 3
E Marija pale xutyildas jekh fonto chacho, haj kuch nardusicko uloj, makhlas le Jezusheske punre, haj peske balenca khoselas kodal. O kher pherdyilas le makhlimaske lashi sungimatasa.
verso 4
Pe kado mashkar leske sityarde o jekh, o ishkarioticko Judash, kon lesko purritori kerdyilas kade das duma:
verso 5
„Sostar chi bikindine kado makhlipe pe trinshela denaro, haj te dinesasles kothe le chorrenge?”
verso 6
Kado pale na anda kodo phendas, ke pe chorrende te avilino les grizha, ba ke chor sas, haj ke leste sas e trasta, le dimata chorelas.
verso 7
O Jezush pe kado kade das duma: „Dela pacha, ke pe muro praxomasko dyes te kerel kodo.
verso 8
Ke chorre sagutnes avna tumenca, ba me chi avo sagutnes tumenca.”
verso 9
Mashkar le bibolde but zhene avri zhangline, ke kothe si, haj kothe geline, na feri anda o Jezush, ba vi le Lazares te dikhen, kas opretrajardas anda meripe.
verso 10
Le angrashaja pale pa kodo vorbinas, ke vi le Lazares mudaren,
verso 11
ke mashkar le bibolde but zhene geline kothe anda leste, haj patyanas ando Jezush.
Andrezhape ando Jeruzhalemo
verso 12
Kaverdyes, kana e butimata, save pe baredyesa aviline, ashundine, ke o Jezush ando Jeruzhalemo avel,
verso 13
palmenge kranzhi xutyildine, angla leste geline haj kade cipinas:
„Hozhana!
Ashtyilimej, kon ande Rajesko anav avel,
haj le Izraelesko kraj si!”
verso 14
O Jezush pale rakhlas jekh magaraka khurora, oprebeshlas pe late, sar iskirime si:
verso 15
„Na dara Sioneski shej!
Aketa, tyo kraj avel pe magaricko khurori beshindos!”
verso 16
Leske sityarde majanglal chi hatyarenas kado, ba kana o Jezush luvudyisajlas, palpale serosardine pe kodo, ke kodo kerdine lesa so iskirime sas pa leste.
verso 17
Chachardas apol pa leste o butipe, save lesa sas, kana angle akhardas le Lazares anda murmunto, haj opretrajardas les anda meripe.
verso 18
E butimata apol zhianda kodo gelas angla leste, ke ashundas, ke kadi traba kerdas.
verso 19
Le farizana atunchi kade dine duma jekhavreste: „Dikhen, ke pe khancheste chi zhan? Aketa, e intrego luma zhal pala leste!”
Le Jezusheske palune vorbimata angla but manusha: la zhejake chasuri
verso 20
Mashkar kodal, kon opregeline, te rudyin pel baredyesa, sas vi unyizhene hellena.
verso 21
Kadal kothe gelne kaj o Filip, kon anda galileicko Betsaida sas, haj mangenas les: „Raja, fajas amen, te dikhas le Jezushes!”
verso 22
O Filip gelastar haj duma das le Andrasheske, pe soste o Andrash haj o Filip gelinetar, haj duma dine le Jezusheske.
verso 23
O Jezush kado phendas lenge: „Avlatar o chaso, ke le Manushesko Shavo te luvudyisajveltar.
verso 24
Amen, amen phenav tumenge: kana ande phuv pelino dyivesko sumburo chi merel, korkoro ashol, ba te merel, atunchi but upaj kerel.
verso 25
Kon kamel pesko trajo, xasarel kodo, haj kon rucil pesko trajo pe kadi luma, inkrel kodo po sagutno trajo.
verso 26
Kon mange slugil, te avel pala mande, haj kaj me som, kothe avla vi muri sluga. Kodoles, kon slugil man, patyivisarela les o Dad.
verso 27
Akanak mishkisajlas muro duho. So te phenav? Muro Dad, muntusar man kathar kado chaso? Haj apol anda kado avilom, anda kado chaso.
verso 28
Muro Dad, luvudyisar tyo anav!” Pe kado glasipe ashundyilas anda cheri: „Aba luvudyisardomles, haj pale luvudyisaroles.”
verso 29
Kodal manusha, kon kothe tordyonas, haj ashundine kado, kodo phendas, ke le cheresko bashavjipe sas. Kavera kade dine duma: „Andyelo das duma leste.”
verso 30
O Jezush kodo phendas: „Na anda mande ashundyilastar kado glasipe, ba anda tumende.
verso 31
Krisipe sas akanak pe luma, akanak shudena avri kadala lumake krajes.
verso 32
Me pale, kana opreasharena man pa phuv, sakofalo mande cirdav.”
verso 33
Kado anda kodo phendas, ke te sikavel anglal, ke soske meripesa merela.
verso 34
E butimata kodo phendas: „Ame kodo ashundam anda kris, ke o Kristo sagda ashola. Sostar phenes apol: »Le Manusheske Shaves opretrubul te asharen?« Kon si le Manushesko Shavo?”
verso 35
O Jezush kodo phendas lenge: „Aba feri cerra vramate si tumende o fimlalipe. Zhikaj kodo phiren, zhikaj tumaroj o fimlalipe, ke o tunyarikipe andre tena sharavel tumen. Kon ando tunyariko phirel, chi zhanel, ke kaj zhal.
verso 36
Zhikaj tumaro si o fimlalipe, patyan ando fimlalipe, ke le fimlalimaske shave te aven.” Kadala phendas o Jezush, pala kodo gelastar, haj garadyilas angla lende.
Anda soste o bipatyape si
verso 37
Chaches, ke kattyi somnura kerdas angla lenge jakha, ba chi kade chi patyanas ande leste,
verso 38
ke andre te pherdyol le Izajasheski vorba, kon kadala phendas:
„Raja, kon patyalas amare vorbimata,
haj le Rajeski kuj kaske sikadyilas?”
verso 39
Chi zhanen te patyan, ke o Izajash vi kadal phendas:
verso 40
„Korreske kerdas lenge jakha
haj capenyisardas lengo ilo,
tena dikhen penge jakhenca
haj tena hatyaren penge ilenca,
tena boldenpe karing o Del
haj te sastyarav len”.
verso 41
Kadal phendas o Izajash, ke dikhlas lesko luvudyipe haj pa leste vorbisardas.
verso 42
Ba vi kade, inke vi mashkar angmanusha patyanas ande leste but zhene, ba anda farizana, kado chi phendine avri, ke avri tena phandaven len anda zhinagoga.
verso 43
Ke majfeder kamenas le manushengo patyivisaripe, sar le Devleske luvudyimata.
Dumadinipe po alosaripe
verso 44
O Jezush pale oprevazdas pesko glaso haj kade das duma: „Kon patyal ande mande, na ande mande patyal, ba ande kodo, kon bishaldas man.
verso 45
Haj kon man dikhel, kodales dikhel, kon bishaldas man.
verso 46
Anda kodo avilom ande luma, ke fimlalimata te avav, ke sa kodo, kon patyal ande mande, ando tunyariko tena ashol.
verso 47
Kana pale varikon ashunel mure alava, ba chi inkrel kodolen, chi krisarav les. Ke na anda kodo avilom, ke te krisarav la luma, ba te muntusarav la luma.
verso 48
Si kon, te krisarel kodales, kon tele dikhel man, haj chi lel peskireske mure alava: o alav so phendom, kodo krisarel les po paluno dyes.
verso 49
Ke na mandar vorbisardom, ba kon bishaldas man, o Dad, voj vladisardas mange, ke so te phenav haj so te vorbisarav.
verso 50
Zhanav, ke lesko vladipe sagutno trajoj. So apol me vorbisarav, kade phenav, sar o Dad phendas mange.”
Libros
