Evangeliumo kathar o Janosh
capítulo 7
O Jezush krujil le butimatan
verso 1
Pala kado o Jezush andre phirdas e Galilea. Chi kamlas ande Judea te zhal, ke le bibolde po meripe rodenasles.
verso 2
Pashe sas le biboldengo barodyes, o cerhaslo barodyes.
verso 3
Leske phral atunchi kodo phendine leske: „Zhatar kathar, zha ande Judea, ke vi tye sityarde te dikhen tye trabi, so keres!
verso 4
Ke khonyik chi butyarel ande tajna, kana po pinzharipe kamel te resel. Kana kadal keres, sikav tut la lumake!”
verso 5
Ke inke chi leske phral chi patyanas ande leste.
verso 6
O Jezush kodo phendas lenge: „Muri vrama inke naj kathe, ba tumenge e vrama sagutnes lashi si.
verso 7
Tumen nashtig rucil e luma, ba man rucil, ke me chacharav pa kodo, ke lenge trabi nasulaj.
verso 8
Tume numa zhan opre po barodyes, me chi zhav opre pe kado barodyes, ke muri vrama inke chi pherdyilas andre.”
verso 9
Kadal phendas, haj voj ande Galilea ashilas.
verso 10
Ba kana leske phral opregeline po barodyes, vi voj opregelas, ba na avri sikades, ba ande tajna.
verso 11
Le bibolde rodenas les po barodyes, haj kodo pushenas: „Kaj si voj?”
verso 12
Mashkar le manusha but sakofalo phenenas pa leste. Sas kon kadal phenenes: „Lasho manush si kodo!” Kavera pale: „Na, ke xoxavel le manushen.”
verso 13
Ba khonyik chi tromalas avri sikades te vorbil pa leste, ke daranas kathar le bibolde.
O Jezush sityarel ande khangeri
verso 14
Kana aba le baredyesesko mashkar sas, o Jezush opregelas ande khangeri haj sityarelas.
verso 15
Le bibolde chudinaspe, haj kado phenenas: „Kathar pinzharel le Iskirimata, kana apol china chi sityilasle?”
verso 16
O Jezush kado phendas lenge: „Muro sityaripe, na muroj, ba kodaleskoj, kon man bishaldas.
verso 17
Kana varikon gataj lesko kamipe te kerel, kodo oprepinzharel pa sityaripe, ke kathar o Del si, bake me mandar vorbisarav dore.
verso 18
Kon pestar vorbisarel, kodo pesko luvudyipe rodel, ba kon peske bishalareske luvudyipe rodel, kodo o chachipe phenel, haj naj ande leste xoxamnipe.
verso 19
Na o Mozesh das tumenge e kris? Haj khonyik mashkar tumende chi kerel la krisa. Sostar kamen apol man te mudaren?”
verso 20
Le manusha kodo phendine: „Beng si tut! Kon kamel tut te mudarel?”
verso 21
O Jezush kodo phendas lenge: „Numa jekh butyi kerdom, haj savorazhene xolyajven.
verso 22
O krujalshinipe o Mozesh das tumenge – ba kodo china na kathar o Mozesh si, ba kathar le dada –, haj savatone krujal shinen le manushes.
verso 23
Kana varikon krujal shaj shinavelpe savatone kade, ke ande Mozesheski kris dosh tena kerdyol, atunchi sostar xolyajven pe mande anda kodo, ke le intregone manushen sastyardom savatone?
verso 24
Na krisaren pa dichipe numa, ba chache krisasa krisaren!”
Le manushenge pushlimata pa Jezush
verso 25
Mashkar le Jeruzhalemicka unyizhene kodo phenenas: „Na voj si kodo, kas zurales roden?
verso 26
Aketa, angla sakoneste vorbil, haj khanchi chi phenen leske? Dore, le angmanusha oprepinzhardine, ke voj si o Kristo?
verso 27
Ba pa leste, zhanas, ke katharutnoj, o Kristo pale kana aveltar, khonyik chi zhanel, ke kathar si.”
verso 28
Atunchi o Jezush, kon ande khangeri sityarelas, kade cipisardas opre: „Pinzharen vi man, haj zhanen vi kodo, ke katharutno som. Ba me na mandar avilom, ba kodo bishaldas man, kon Chachoj, kas tume chi pinzharen.
verso 29
Me pinzharav les, ke lestar som, haj voj bishaldas man.”
verso 30
Atunchi fajlino les te xutyilen, ba khonyik chi vazdas pe leste vast, ke inke chi avilastar lesko chaso.
verso 31
Ba mashkar le manusha but zhene patyanas leske, haj kodo phenenas: „O Kristo kana aveltar, dore, majbut chiudicka somnura kerela, sar voj aba kerdas?”
Le angsavatosko xape pa Jezush
verso 32
Ashundine, le farizana, ke le manusha kasave vorbin pa leste, anda kado le angrashaja haj le farizana slugi bishaldine, te xutyilen les.
verso 33
Atunchi o Jezush kade das duma: „Inke jekh cerra vrama tumenca som, pala kodo zhavtar kaj kodo kon bishaldas man.
verso 34
Rodena man, ba chi arakhena, haj kaj me som, kothe tume nashig aven.”
verso 35
Le bibolde anda kado kodo phendine mashkar jekhavreste: „Kaj kamel kado te zhal, kaj chi rakhas les? Dore chi kamel mashkar le hellena te zhal haj le hellenon te sityarel?
verso 36
Ta soski vorbaj kadi so phendas: »Roden man, ba chi arakhena, haj kaj me som, kothe tume nashtig aven«?”
O zhuvindo paji
verso 37
Le baredyesengo paluno barodyes o Jezush tordyilas haj oprecipisardas: „Kana varikon trushajvel, te avel mande, haj te pel sakon,
verso 38
kon patyal ande mande. Sar e Iskirimata phenel: le zhuvende pajeske aba shordyona anda leste.”
verso 39
Kado pa Duho phendas, so kon ande leste patyan, lenales. Ke o Duho inke nas dino, ke o Jezush inke chi luvudyisajlas.
verso 40
Kon mashkar le manusha kadal vorbi ashundine, kado phenenas: „Kado chachikanes profeta si!”
verso 41
Kavera pale kado phenenas: „Kado o Kristoj!” Sas kon kade delas duma: „Dore, na anda Galilea avel o Kristo?
verso 42
Na kado phendas o Iskiripe: »Anda Davideske falura haj anda Betlehemesko than avel o Kristo, kathar o David falosajlas?«”
verso 43
Haj ande butimata shindyipe kerdyilas anda leste.
verso 44
Mashkar lende unyizhene kamline les te xutyilen, ba khonyi chi vazdas vast pe leste.
verso 45
Le slugi palpale geline kaj le angrashaja haj kaj le farizana. Kodal kodo phendine lenge: „Sostar chi andine les?”
verso 46
Le slugi kodo phendine: „Chikana kade manush inke chi vorbisardas!”
verso 47
Pe kado le farizana kado phendine: „Dore, vi tumen xoxadas?
verso 48
Apol mashkar le angmanusha bake farizana patyajlas ande leste varikon?
verso 49
Ba kadal manusha, save chi pinzharen la krisa, armajaslej.”
verso 50
Pe kado o Nikodemus, kon na dulmut leste phirdas, haj mashkar lende sas jekh, kado phendas lenge:
verso 51
„Dore, amari kris, krisarel le manushes, zhiso majanglal chi ashunel les avri, haj chi zhanglinesas avri, ke so kerdas?”
verso 52
Kodal kado phendine leske: „Dore, chi san vi tu galileicko? Dikh pala leste, haj dikh andre, ke anda Galilea nashtig avel profeta!”
verso 53
Pala kodo savorazhene khere geline ande pengo kher.
Libros
