Evangeliumo kathar o Mark

Capítulos:

… 11 12 13 14 15 16   ⇤ ← 14 → ⇥

verso 1

Duje dyesenca pala kado sas la patradyako ratyako xamo haj le bi kamire manrengo barodyes. Le angrashaja haj le iskiritora pa kodo vorbisarnas, ke sar shaj xutyilnas les xajipesa, haj sar shaj mudarenas les.

verso 2

Ke kodo phendine: „Na pe baredyeseste, tena avel maripe mashkar butimata.”

verso 3

Kana o Jezush ande Betania sas ande lepralone Shimonesko kher haj kaj e mesalya beshelas, kothe gelas leste ekh romnyi, ande alabashtromicko vaso chachi, kuch nardushicko uloj andines. Phaglas o alabashtromo, haj pe lesko shero shordas les.

verso 4

Sas kon xolyajlas anda kado, haj kade vorbinas mashkar pende: „Pe soste sas lasho kade po khanchi avri te shoren kado uloj?

verso 5

Kado uloj shaj bikindesas majbut, sar pe trinshela denara, haj le love shaj dinesas kothe le chorrenge!” Haj xolyajline pe romnyi.

verso 6

Ba o Jezush kade das duma: „Denla pacha! Sostar azban la? Ke lasho kerdas mange.

verso 7

Chorre sagda avla tumenca, haj kana kamen, mishtyipe shaj keren lenge: ba me chavo sagda tumenca.

verso 8

Voj kerdas kodo, so kathar laki zor sas: anglal makhlas muro trupo po praxope.

verso 9

Apol, phenav tumenge: pe intrego luma, kaj sityarena kado evangeliumo, phenena vi kodo, so voj kerdas, pe lako serovjipe.”

verso 10

O ishkarioticko Judash apol, mashkar deshuduj o jekh, gelastar kaj le angrashaja, avri te del les lenge.

verso 11

Kana kado ashundine von, losshajline, haj vi phendine leske, ke love dena les. Voj pale zhukarlas e vrama, kana shaj del avri les.

verso 12

Le bikamire manresko angluno dyes, kana la patradyako bakrora opresarkafenas, leske sityarde pushline lestar: „So kames, kaj te zhas angle te lasharas, te shaj xas la patradyako ratyako xamo?”

verso 13

Atunchi bishaldas dujen mashkar peske sityarde, kadale vorbenca: „Zhantar ando foro. Maladyona kothe jekhe manushesa, kon pajesko khoro ingrel. Zhan pala leste,

verso 14

haj kaj andre zhala, phenen le khereske rajeske, ke o Maistrovo pushel: »Kaj si muro than, kaj la patradyake bakrora mure sityardenca shaj xav?«

verso 15

Sikavla tumenge ekh baro xamaskosko than gata, sakofalo avri shutines. Kothe lasharen angle amenge.”

verso 16

Leske sityarde oprelinepe haj andre geline ando foro. Sakofalo kade arakhline, sar phendas lenge, haj kerdine la patradyako xamos.

verso 17

Kana andre ratyilas, kothe reslas le deshudujenca.

verso 18

Kana tele beshline haj xanas, o Jezush kade das duma: „Amen, phenav tumenge: mashkar tumende o jekh, kon manca xal, purrila man”.

verso 19

Pe kado kukola brigajline, haj jekhtunes pushenas lestar: „Dore na me som kodo, Raja?”

verso 20

Voj kodo phendas lenge: „Mashkar deshuduj o jekhto, kon manca jekharsa bolel anda tejari.

verso 21

Ke le Manushesko Shavo zhalatar, sar vi si iskirime pa leste, ba jaj si kodale manusheske, kon le Manusheske Shaves purril! Majmishto avilino kodale manusheske, chi tena arakhadyilino!”

verso 22

Sar xanas, o Jezush xutyildas o manro, ashtyilipe phendas, phaglas les, haj kothedasles lenge kadale vorbenca: „Xutyilen les, kado muro trupoj.”

verso 23

Pala kodo xutyildas o taxtaj, najisipe phendas, kothe das les lenge, haj piline anda leste savorazhene.

verso 24

Voj pale kade das duma: „Kado muro rat si, le nyeve tashtamentosko, savo anda butimata avri shordadyol.

verso 25

Amen, phenav tumenge: majbut aba chi pav anda drakhesko upajipe zhikaj kodo dyes, zhikaj o nyevo chi pav ande Devlesko them.”

verso 26

Palasoste gilyabade o himnuso, avrigeline pe uloj kashtengo plaj.

verso 27

O Jezush kodo phendas lenge: „Savora zhene koldolardyona ande mande, ke iskirime si: »Marav le malyares, haj rispisardyon le bakra«.

verso 28

Ba palasoste opretrajisardyilom, angla tumende zhav ande Galilea.”

verso 29

O Peter pe kado kodo phendas leske: „Sakonesko patyape te bandyola ande tute, muro patyape ande tute chikana chi mukela man!”

verso 30

O Jezush kado phendas leske palpale: „Amen, phenav tuke, tu inke kadi ratyi zhiso majanglal o bashno duvar cipila, vi trivar asvikaresa man.”

verso 31

Voj inke majfeder zurarlaspe: „Inke vi tusa kethanes te trubuj te merav, chi atunchi chi asvikaro tut!” Zhikade vorbinas vi le majbut savorazhene.

verso 32

Kothe resline ando majro, saves Getsamaneske anavarenas. Atunchi kodo phendas peske sityardenge: „Beshen tele kathe, zhikaj rudyisarav.”

verso 33

Pashapeste las le Peteres, le Jakabos haj le Janoshes, haj laspe te izdral haj te dukhardyol.

verso 34

Kodo phendas lenge: „Mulikanes brigakoj muro dyi. Ashon kathe haj ratyaren.”

verso 35

Jekh cerra majangle gelas, pe phuv burdosajlas haj rudyilas, ke te shaj, te durutnisajvel lestar kado chaso.

verso 36

Kado phendas: „Abba, Dade! Sakofalo shajipe si tuke. Le mandar kado taxtaj! Ba na kodo t«avel, so me kamav, kodo so tu.”

verso 37

Pala kodo palpale avilas, haj sovjindos arakhlas len. Kade das duma kaj o Peter: „Shimon, ta soves? Chi zhanglan te ratyares jekh chaso?

verso 38

Ratyaren haj rudyin, ke ande zumavjimata tena peren! O duho gata si, ba o trupo slaboj.”

verso 39

Pala kado pale gelastar haj rudyilas, zhikodale vorbenca save majinte phenelas.

verso 40

Pale palpale gelas, haj sovjindes arakhlas len, ke lenge jakha pharosajline: china chi zhanenas, so te phenen palpale leske.

verso 41

Pala kodo vi po trito kothe avilas, haj kodo phendas lenge: „Soven feri haj pachardyon! Dostaj, reslas o chaso! Aketa, le Manusheske Shaves ande bezexalenge vast dena.

verso 42

Ushtyen opre, zhastar! Aketa, pashe si aba, kon purril man.”

verso 43

Inke vorbilas, kana reslas o iskarioticko Judas, o jekh mashkar deshuduj, haj lesa but manusha xanrenca rolyanca kathar le angrashaja, kathar le iskiritora haj kathar le phure bishaldines.

verso 44

Kon purrisardas les, somno sikadas lenge: „Kas chumidav, voj si, xutyilen les, haj mishto samalines ingren les.”

verso 45

Kana kothe reslas, sigo kothe ushtyadas leste, haj kade das duma: „Rabbi!” Haj chumidas les.

verso 46

Kodal pale vast vazdine pe leste, haj xutyildine les.

verso 47

Kon kothe sas, mashkarlende jekh xanro cirdas, pe angrashajeski sluga maladas, haj tele shindas lesko kan.

verso 48

O Jezush kade das lende duma: „Sar pekh varisosko chor, kade aviline avri xanrenca haj rolyanca, te xutyilen man.

verso 49

Sako dyes tumenca somas, sityaros ande khangeri, haj inke chi xutyildine man. Ba le iskirimatange andre trubuj te pherdyon.”

verso 50

Leske sityarde atunchi mukhline les, haj savorazhene nashlinetar.

verso 51

Ba jekh terno zhalas pala leste, pe lesko nango trupo numa jekh gad sas. Xutyildine les,

verso 52

ba kodo, pesko gad kothe muklines, nanges nashlastar lendar.

verso 53

Le Jezushes kaj o angrashaj ingerdine. Kethane avilas leste sako angrashaj, iskiritori haj phuro.

verso 54

O Peter pale dural zhalas pala leste, zhiandre kaj le angrashajesko dyiz, haj le sluganca kethanes kaj e jag tele beshindos tatyolas.

verso 55

Le angrashaja haj o intrego svato, colaxaripe rodenas po Jezush, te shaj den les po meripe, ba chi arakhline.

verso 56

But zhene dinepe xoxamnes colaxa pe leste, ba lenge phenimata nas jekh.

verso 57

Palunes unyizhene opretordyiline, haj xoxamne colaxa phendine pe leste kadale vorbenca:

verso 58

„Ashundam, ke kado kodo phendas: »Tele putrav kadi khangeri so vastenca kerdine, haj tala trin dyes kaver vazdav, so na vast kerdas«.”

verso 59

Ba lenge phenimata chi kade chi anenas pe jekhavreste.

verso 60

Atunchi o angrashaj mashkaral tordyilas, haj pushlas le Jezushes: „Khanchi chi phenes sa pe kodo, so kadal pe tute colaxaren?”

verso 61

Voj bi vorbako a-shilas, haj khanchi chi phendas. O angrashaj pale pushlas les: „Tu san apol o Kristo, le ashtyilime Devlesko Shavo?”

verso 62

O Jezush kado phendas leske: „Me som. Haj dikhena le Manusheske Shaves pe Saktimoski chachi rig te beshel, haj te aveltar ande chereske norura”.

verso 63

Atunchi o angrashaj shingerdas peske gada, haj kade das duma: „Ta so grizha si amen inke pe colaxara?

verso 64

Ashundine o kushlipe. So gindin?” Pe kado savorazhene po meripe krisardine les.

verso 65

Pala kado sas kon tele shungardas les, andre sharade leski mosura, haj dukhumenca malavenas les, haj kodo phenenas leske: „Profecisar!” Haj inke vi le slugi pa muj shinenas les.

verso 66

Talakadi vrama o Peter tele sas ande avlina. Kothe avilas le angrashajeski jekh sluga,

verso 67

dikhlas le Peteres ke tatyol, mishto dikhlas les, haj kodo phendas: „Vi tu le Nazaretickone Jezushesa sanas!”

verso 68

Ba voj asvikarlas: „Chi pinzharav les, haj chi kodo chi hatyarav, ke so phenes.” Pala kodo avri gelas ande angluni kinda: atunchi oprecipisardas o bashno.

verso 69

E sluga pale dikhlas les, pale las te phenel le majbute manushenge, ke vi kado mashkar lende si.

verso 70

Voj pale tele asvikardas. Na pala buteste, kon kothe tordyonas, pale kade dine duma kaj o Peter: „Chachikanes anda lende san, ke Galileako san.”

verso 71

Voj pale las armaja te del haj te colaxarel: „Chi pinzharav kodale manushes, pa kaste vorbin!”

verso 72

Pe kado oprecipisardas o bashno, po dujto. Le Petereske pale palpale serosardyilas le Jezusheski vorba, so phendas leske: „Zhimajanglal o bashno duvar cipila, trivar asvikaresa man.” Haj las te rovel.

Capítulos:

1 2 3 4 5 6 7 8 9 10 11 12 13 14 15 16