Evangeliumo kathar o Mark
capítulo 7
Pa uzhipe haj biuzhipe
verso 1
Atunchi krujal lineles le farizana, haj unyi iskiritora, kon anda Jeruzhalemo aviline.
verso 2
Kadal kodo dikhles, ke mashkar leske sityarde, bi thode vastenca xan o manro, xolyajline.
verso 3
Ba le farizana, haj le bibolde, kana numa jekh burnyik pajesa chi thoven pengo vast, chi xan, opreinkerdines le dulmutanenge tradicija.
verso 4
Kana anda foro aven, chi xan, zhikaj chi thoven pen; haj but kaver traba si, so anda tradicija trubuj te inkresaren: le lozhonge haj taxtajenge, xarkom vasonge haj patonge thovjipe.
verso 5
Pushline les apol le farizana haj le iskiritora: „Sostar chi trajin tye sityarde kade, sar e tradicija phenel, sostar xan manro bi thovjimaske vastenca?”
verso 6
Voj kado phendas lenge: „Mishto phendas pa tumende o Izajash, tume paxande, sar iskirime si:
»Kadal populara penge vushtenca patyivin man,
ba lengo ilo dur si mandar.
verso 7
Ba shaj patyivin man,
kana numa manushengo zhanaipe haj vladipe sityaren«.
verso 8
Ke le Devleske vladimata mukindes le manushenge tradiciji inkren, le taxtajengo haj lozhongo thovjipe, haj but kaj kadal pashe tordyinde trabi keren.”
verso 9
Haj kade vorbilas majdur: „Shukares avri bolden le Devlesko vladipe, tumare tradiciji te inkren.
verso 10
Ke o Mozesh kodo phendas: »Patyivin tye dades haj tya da«; haj: »Kon peske dades bake deja marhil, te merel kodo«.
verso 11
Tume pale kodo phenen: »O manush kodo te phenel peske dadeske bake dake: korbanoj, avri phendes colaxuni tofna si kodo, so mandar tuke phirlas«,
verso 12
pala kodo apol aba chi muken variso te kerel anda pesko dad thaj dej,
verso 13
haj kade shinen le Devleski vorba anda tumari tradicjaki voja, so vi majdur den; haj inke but kaj kadal pashune trabi keren tume.”
verso 14
Pala kado pale peste akhardas le butimatan, haj kodo phendas lenge: „Ashunen pe mande savorazhene haj hatyaren man:
verso 15
khanchi, so avral zhal andre ando manush, nashtig shol les biuzheske, ba so anda manush avri avel, kodo melyarel andre le manushes.
verso 16
Kas kan si po ashundyipe, t«ashunel les.”
verso 17
Andre gelas ando kher anda butimata, haj pushline les leske sityarde pa parabolengo hatyaripe.
verso 18
Kado phendas lendge: „Haj vi tume kasave bi hatyarde sanle? Chi dikhen andre, ke sa kodo, so avral zhal andre ando manush, nashtig melyarel les andre,
verso 19
ke na ande lesko ilo resel, ande leski rinza, pala kodo ande ushajinesko iskamin resel? Kadalesa uzhardas sakone xamaskos.
verso 20
„Apol sar phendom, so anda manush avri avel, kodo shol biuzheske le manushes.
verso 21
Ke andral, anda manushesko ilo aven le nasul gindimata, ansurimatange oprephaglimata, chorimata, mudarimata,
verso 22
muklimata, pohortyimata, nasulimata haj xoxavjimata, pimata, xanzhvalimata, kushlimata, phutyardimata haj bi godyimata.
verso 23
Sa kadal nasulimata andral aven, haj biuzheske shon le manushes.”
Jekh shejako sastyaripe kaski dej murtikani sas
verso 24
Pala kado majdur gelas kothar, pe Tíruseske haj Sidoneske phuva. Andre gelas andekh kher, ba chi kamelas vi varikon avri te zhanel; ba chi kade nashtig ashilas ande tajna.
verso 25
Vi sigo ashundas jekh romnyi, ande kaski shej biuzho duho sas; kothe avilas haj anglaleske punre shudaspe.
verso 26
E romnyi murtikani sas, anda sír-f”nícicko falo, haj mangelas les, te nashavel avri anda laki shej le benges.
verso 27
Voj kodo phendas lake: „Mukh te chalyon majanglal le shavora: ke chi perelpe te len le shavorengo manro, haj kothe te shuden les le cine zhuklenge.”
verso 28
Ba e romnyi majdur vorbilas: „Raja! Vi le cine zhukela xan tala mesalya anda shavorenge purshuka!”
verso 29
Pe kado voj kado phendas lake: „Ke kado phendan, zha, avri gelas anda tyi shej o beng.”
verso 30
Kana khere reslas, la cina sha po pato pashjindes araklas, haj o beng avri gelas aba anda late.
Le kashukemutosko sastyaripe
verso 31
Pala kado pale gelastar pa Tíruseske phuva. Pa Sídon perdal kaj e Galileaki mara gelas, ande Desheforonge granica.
verso 32
Kothe ingerdine leste jekhe kashukemutones, haj mangenas les, te shol pe leste pesko vast.
verso 33
Rigate ingerdas les mashklar le but manusha, ande leske kan pizdas peske naja, shungardas, kaj leski shib reslas,
verso 34
haj po cheri opredikhindes, rudyilas, haj kodo phendas leske: „Effeta!”, zhikade phendes „Puterdyu!”
verso 35
Pe kado puterdyiline leske kan, avriputerdyiline leske shibeske shela, haj uzhes vorbilas.
verso 36
Atunchi vladisardas lenge, ke kado khanyikaske tena phenen avri. Ba zhisar nashtilas lenge, kodal inke majfeder viacarenas sakoneske.
verso 37
Zurales bare dikhenas haj kado phenenas: „Sakofalo mishto kerdas: le kashukenge palpale das lengo ashunipe, haj pe vorba zhutisardas le muton!”
Libros
