Evangeliumo kathar o Mark
capítulo 5
Le gerazelickone bengalesko sastyaripe
verso 1
Na pa buteste perdal resline pe mara pe gerazelenge phuva.
verso 2
Kana avri ushtyilas anda bero, sigo angla leste gelas jekh manush mashkar murmuntura, ande kaste biuzhe duhura sas,
verso 3
haj ande murmuntura beshelas. Aba chi sastranca chi zhnenas te phanden les.
verso 4
Butivar ande lupunza haj veringa phandade les, ba shingrelas vi le veringa, phagerlas le sastra, haj khonyik chi zhanelas tele te xutyilel les.
verso 5
Vi dyese vi ratyi ande murmuntura haj mashkar le plaja phirelas, cipilas haj barrenca shingrelas pes.
verso 6
Kana dural dikhlas le Jezushes, kothe nashlas, tele shudaspe angla leste,
verso 7
haj bare glasosa cipilas: „So grizha si man kaj tute, Jezush, le uchimaske Devlesko Shavo? Po Del phenav tuke, na azba man!”
verso 8
Ke voj kodo phendas leske: „Biuzho duho, zha avri anda manush!”
verso 9
Atunchi pushlas lestar: „Soj tyo anav?” Kodo kado phendas leske palpale: „Legio si muro anav, ke but zhene sam.”
verso 10
Haj rudyindes mangelas les, tena nashavel les avri pa kodal phuva.
verso 11
Sas kothe krujal pa plaj jekh mal, pe soste but bale xanas.
verso 12
Le beng kodo mangenas lestar: „Bishal amen ande bale, mukh te zhas ande lende.”
verso 13
O Jezush muklas kado lenge. Le biuzhe duhura avri geline haj ande bale hurajline. Pe kado le dujmiji bale ande mara nashline, haj vi andre tasadyiline ande mara.
verso 14
Kon sama lenas pe lende, nashletar, haj sakonenge avri phende ande gava haj vi ando foro, ke so pecisardyilas. Le manusha avri geline te dikhen, ke so pecisajlas.
verso 15
Kaj o Jezush reslines dikhle, ke o bengalo opreurades, uzha godyasa beshel opre, haj lasle e dar.
verso 16
Kon pale dikhline e traba, kodal pale phendine lenge, ke so pecisardyilas le bengalesa haj le balenca.
verso 17
Anda kado line te mangen les, te zhaltar pa lengi granica.
verso 18
Kana andre ushtyilas ando bero, o manush kon bengalo sas, mangelas les te shaj zhal lesa.
verso 19
Ba o Jezush chi muklas kado leske, ba kade das duma: „Zha khere kaj tyire, haj phen lenge, ke soski bari butyi kerdas tusa o Raj, haj sar sunusardyilas pe tute!”
verso 20
Kodo vi gelastar, haj vi phenelas ande Deshforura, ke o Jezush soski bari butyi kerdas lesa. Haj sakon bari dikhelas.
Le Jairuseske shejako opretrajaripe haj jekha nasvaja romnyako sastyaripe
verso 21
Kana o Jezush pale perdal berardas pe kaver dolma, but manusha line les krujal, kothe kaj voj sas pasha paji pe dolma.
verso 22
Atunchi kothe avilas leste jekh zhinagogicko anglalutnari, kas Jairuseske anavarenas. Kana dikhlas les, changa das angla leske punre,
verso 23
haj kade mangelas les: „Muri shelyori po meripe si, av shuv pe late tyo vast, te sastyol haj te trajil!”
verso 24
Vi gelastar lesa. But manush zhanas pala leste kattyi, ke vi kikidenas les.
verso 25
Jekh romnyi, kon aba deshuduj bersh, ke podyasli sas,
verso 26
haj but dukha sasla aba kathar le but sastyara, so sasla sakofalo bikindas, ba khanchi chi reslas lasa, numa inke majnasules kerdyilas,
verso 27
sar ashundas pa Jezush, palal kothe gelas mashkar le manusha haj kaj leske gada reslas.
verso 28
Kodo gindilas: „Numa kaj leske gada te reso, sastyuvav.”
verso 29
Chachikanes nachilastar lako podyaslipe, haj hatyarlas ande pesko trupo, ke sastyilas anda nasvalipe.
verso 30
Ba o Jezush, kon ande kodo minuto sama las, ke zor gelas avri anda leste, karing le butimata boldaspe haj pushlas len: „Kon reslas kaj mure gada?”
verso 31
Leske sityara kodo phende leske: „Dikhes, ke sar kikiden tut le manusha, haj vi kade pushes, ke kon reslas mande?”
verso 32
Pe kado krujal dikhlas, ke kon sas.
verso 33
E romnyi pale, kon zhanelas, ke so pelaspe lasa, daramnes haj izdramnes angle avilas, tele shudaspe angla leste, haj chachikanes avri phendas leske sakofalo.
verso 34
Voj pale kado phendas lake: „Muri shej! Tyo patyape sastyardas tut. Zha pachasa, haj av uzhi kathar tyo nasvalipe.”
verso 35
Inke vorbilas kana avile kathar o zhinagogicko anglalutnari, haj kodo phendine: „Tyi shej aba mulas. Sostar khinyaresas majdur le Maistrovos?”
verso 36
O Jezush ashundas, ke so phendine, haj kade das duma kaj zhinagogicko anglalutnari: „Na dara, feri patya!”
verso 37
Chi muklas kaver lesa te zhal, numa o Peter, o Jakab haj o Janosh, le Jakabosko phral.
verso 38
Kothe resline kaj le zhinagoga anglalutnaresko kher, kaj dikhlas le butimatan, haj le zurales rovjarden haj dukhardyilen.
verso 39
Andre gelas, haj kado phendas lenge: „Sostar cipin haj roven? Chi mulas e shavori, numa sovel.”
verso 40
Ba kodal avri assadine les. Atunchi bishaldas kothar savorazhenen, peste akhardas la shake dades haj deja haj kon lenca sas, haj andre gelas kothe, kaj e shejori pashjolas.
verso 41
Xutyildas la shavorako vast, haj kodo phendas lake: „Talita, kumi!”- so kodo phenel: „Cini shej, phenav tuke, ushtyi opre!” –
verso 42
E cini shej ande kodo minuto opreushtyilas haj las te phirel. Deshuduje bershengi sas. Sakon bari dikhlas.
verso 43
Voj pale zurales vladisardas lenge, ke kado khonyik avri tena zhanel, pala kodo phendas lenge, te den te xal la shejora.
Libros
