Evangeliumo kathar o Lukach

Fejezetek:

… 4 5 6 7 8 …   ⇤ ← 6 → ⇥

1. vers

Pecisardyilas apol, ke savatone, kana pe phuva phirelas, leske sityarde tele shingrenas le spikura, haj penge vastenca avri mordines xanas len.

2. vers

Mashkar le farizana unyizhene kodo phenenas: „Sostar keren kodo, so savatone naj slobodo?”

3. vers

O Jezush kado phendas lenge: „Chi ginade, ke so kerdas o David, kana bokhajlas, haj kon lesa sas?

4. vers

Ke sar gelas andre ande Devlesko kher, sar las le avri shutine manre, xalas, haj das vi le majbuten kon lesa sas, saven naj slobodo te xan, feri korkoro le rashajenge?”

5. vers

Pala kodo inke kado phendas pashe: „Le Manushesko Shavo rajil vi le savatones.”

6. vers

Pecisardyilas pala kodo pekh kaver savatuno dyes, ke andre gelas ande zhinagoga haj sityarelas. Sas kothe jekh manush, kaske lesko chacho vast shutyilastar.

7. vers

Le iskiritora haj le farizana pale dikhenas, ke sastyarel dore vi savatone, te rakhen variso, sosa shaj dosharen les.

8. vers

Ba voj pin-zharelas lenge gindimata, haj kade das duma kaj kodo manush saveske tele sas shutyilime lasko vast: „Ushtyi opre haj tordyu mashkaral!”

9. vers

Pala kodo o Jezush kodo phendas lenge: „Pushav tumen, slobodo si apol savatone lashipe bake nasulipe te keras, trajo te muntusaras bake mukas te xasajvel?”

10. vers

Pala kodo krujal dikhlas pe savorazhenende, haj kade das duma kaj o manush: „Lunzhar avri tyo vast!” Kodo vi kade kerdas, haj sastyilas lesko vast.

11. vers

Kodal pe kado zurales oprexolyajline haj pa kodo linepe te vorbin mashkar pende, so te keren le Jezushesa.

12. vers

Pecisardyilas apol ande kodal dyesa, ke avri gelas po plaj te rudyil, haj e intrego ratyi ande le Devleso kamimatipe ratyardas.

13. vers

Kana zorisardyilas, peste akhardas peske sityarden, haj avrialosardas mashkar lende deshudujen. Kadalen aposhtolenge anavardas:

14. vers

Le Shimones, kas vi Petereske anavarenas, haj le Andrashes, leske phrales, haj inke le Jakabos haj le Janoshes, le Filipos haj le Bertalanes,

15. vers

le Matevos haj le Tamashos, le Jakabos, le Alfeuseske shaves, haj le Shimones, kas Zeloteske anavarenas,

16. vers

le Judashes, le Jakabeske shaves, haj le ishkariotickone Judashos, kon purritori kerdyilas.

17. vers

Pala kodo tele gelas lenca, haj tordyilas lenca pekh samtalo than. Lesa sas leske sityardenge jekh baro grupo haj zurales baro butipe anda intrego Judea, anda Tiruso haj Sidoneski maraki rig,

18. vers

kon aviletar, te ashunen les haj te sastyon avri anda penge nasvalimata. Kas pale biuzhe duhura azbanas, sastyiline.

19. vers

E intregone butimata karing leste kamelas te resel, ke zor hatyardyolas avri anda leste, haj sastyardas savorazhenen.

20. vers

Atunchi peske jakha pe peske sityarde vazdas, haj kade das duma:
„Anande sanle, tume chorre, ke tumaroj le Devlesko them.

21. vers

Anande sanle tume, kon akanak bokhajven, ke avridostaren tumen.
Anande sanle, kon akanak roven, ke assana.

22. vers

Anande avna, kana rucina tumen le manusha, haj shudena tumare anava, sar nasulipes anda Manushesko Shavo.

23. vers

Losshan pe kodo dyes haj vojin tumen, ke aketa, barij tumari rig ando rajo! Haj ke lenge dada zhikade kerdine vi le profetanca.

24. vers

Ba jaj tumenge, barvale, ke tume aba line tumari potyinimata!

25. vers

Jaj tumenge, kon akanak chajiline, ke bokhajvena!
Jaj tumenge, kon akanak assan, ke rovena haj pishtyana!

26. vers

Jaj tumenge, kana sakon asharela tumen, ke tumare dada zhikade kerdine le xoxamne profetanca!

27. vers

Ba tumenge, kon ashunen man, kodo phenav: Kamen tumare dushmanon! Keren lashipe kodalenge, kon rucin tumen.

28. vers

Ashtyilisaren kodalen, kon armaja den tumen, haj rudyin anda kodola, kon marhin tumen.

29. vers

Kodaleske, kon pa mosura shinel tut, inker kothe vi e kaver rig: haj kathar kodo kon lel tyo pluvialo, na sunusar chi tyo gad.

30. vers

De sakoneske, kon mangel tutar: haj varikon te lela, so tyiroj, palpale na mang kodo.

31. vers

Sar kamen, te keren tumenca le manusha, vi tume zhikade te keren lenge.

32. vers

Kana kodalen kamen, kon tumen kamen, soski potyin phirel tumenge? Ke vi le bezexasle kamen kodalen, kon len kamen.

33. vers

Haj kodalenca te keren lasho, kon tumenge lashipe keren, soski potyin phirel tumenge? Ke kado vi le bezexasle keren.

34. vers

Haj kodalenge te den unzhiles, kastar sperantisaren, ke palpale len kodo, soski potyin phirel tumenge? Ke vi le bezexasle den unzhiles le bezexaslenge, ke zhikattyi te len palpale.

35. vers

Kamen apol tumare dushmanon! Keren lashipe haj den unzhiles, khanchi palpales na zhukardines: kade bari avla tumari potyin, haj le Uchimatakireske shave avna, ke voj lashoj vi kaj le bi najisarde haj vi kaj le nasula.

36. vers

Aven apolal lashe, sar vi tumaro Dad lasho si!

37. vers

Na krisaren, haj atunchi chi tumen chi krisarenatar! Na krisarentar khanyikas, haj atunchi chi tumen chi krisarena! Jertin sakoneske, haj jertipe resena vi tume!

38. vers

Den, haj dena vi tumenge: lasho haj pherdo, butimatasa dena ande tumare angalya! Ke sodenca vazarena, katyenca vazarena tumenge palpale!”

39. vers

Vi metafora phendas lenge: „Dore o korro shaj sikavel o drom le kaver korreske? Chi peren apol soldujzhene ande xiv?

40. vers

Naj majbaro o sityardo kathar pesko maistrovo: varikon atunchi si feder, kana kasavoj sar lesko maistrovo.

41. vers

Sostar dikhes e phansliga ande tye phraleske jakha, kana o berando, savo ande tyire jakha si, chi les sama?

42. vers

Haj sar shaj phenes tye phraleske: »Phrala, mukh te lav avri e phansliga anda tye jakha«, ande tyire jakha pale chi dikhes o berando? Paxandine! Shude avri majanglal o berando anda tyire jakha, haj atunchi dikhesa, avri te shaj zhanes te les anda tye phraleske jakh e phansliga!

43. vers

Naj lasho kasht, savo nasul frukto upajil: haj naj nasul kasht, savo lasho frukto upajil.

44. vers

Ke sakone kashtes pa leske fruktura pinzharas. Pa kanralebozuli chi kidas gulara, chi pa vepreso chi kidas drakha.

45. vers

O lasho manush lasho anel angle anda peske ileske avuciji, haj o nasul manush anda nasul, nasul anel angle: ke anda ilesko butipe vorbil o muj.

46. vers

Sostar phenen mange: »Raja! Raja!«, kana chi keren kodo so phenav?

47. vers

Sikavav tumenge, pe kaste cirdel, kon mande avel, ashunel muri vorba haj vi kerel kodalen.

48. vers

Po kherkerari manush cirdel, kon po mishto tele hunadas haj o fundo po barruno plaj shutas tele. Kana pala kodo avilas le pajesko baro shordyipe, le khereske das le abesko shordyipe, ba chi zhanglas mujal te delles, ke mishto sas kerdino.

49. vers

Kon pale ashunel, ba chi trajil kodo, pe kodo manush cirdel, kon pesko kher bi fundosko, pe phuv kerdas. Kana o paji leske das, sigo mujaldaspe, haj baro kerdyilas kodale kheresko rumosardyipe.”

Fejezetek:

1 2 3 4 5 6 7 8 9 10 11 12 13 14 15 16 17 18 19 20 21 22 23 24