capitolul 11
Kodo pushav apol: Dore shudas o Del peske popularos? Chi vorba naj pa late! Ke vi me izraelitano som, le Abrahamesko falo anda Benjamineski kunpania.
O Del chi shudas peske popularos, saves peskireske pinzhardas. Dore chi zhanen, ke so phenel o Iskiripe pa Illesh, sar vazdas vorba kaj o Del po Izrael?
„Raja, tye profetan mudardine, tye oltara opreboldine, korkoro me ashilom, haj vi muro trajo kamen te len”.
Haj so phenel leske e devlikani vorba?
„Muklom mange efta miji murshen, kon chi dine changa angla Baal”.
Zhikade vi akanak si ashilime anda gracijako alosaripe.
Ba kana anda gracija, atunchi aba na anda kerdyimata; ke kaver falos e gracija aba kade chi avlas gracija.
Sar si apol? So o Izrael rodel kodo chi reslas. Le alosarde reslineles apol, ba le majbutzhene korrajline,
sar iskirime si:
„O Del sunnako duho das lenge:
Jakha, tena dikhen, kan, tena ashunen,
zhikaj kado dyes”.
„Vi o David kodo phenel:
Lengi mesalya te kerdyol lenge xanreske haj xutyilimaske,
xolyake haj bidake!
Lenge jakha te muglyosajven, ke tena dikhen,
haj lengo dumo bandyar sagutnes!”
Kodo pushav akanak: dore kade pelinetar, ke palunes perentar? Chi sar, boldines, anda lenge bezexa muntuimata kerdyilas le murtikanonge anda kodo, ke len po rivalizalipe te vazdel.
Kana pale vi lenge bezexa lashipe si la lumake, haj lenge na kerdyimata barvalimataj le murtikanonge, sodivar majfeder kodo avla lengo andre pherdyipe!
Ba tumenge, murtikanonge kodo phenav: Apol me le murtikanengo aposhtolo som, muro slugipe patyivisarav,
shajke po rivalizalipe shaj vazdav mure raten, haj muntusarav varisoden mashkar lende.
Ke kana lengo shudipe la lumako ushoripe te si, so kaver avla lengo andre svagaripe, kana na trajo anda meripe?
Kana le upajesko kolipe suntoj, vi anda leste kerdo xumer kodoj, haj kana e rikita suntoj, vi le kranzhi kodalaj.
Kana vi varisode kranzhi tele te phadyiline, tut pale mashkar lende shutine kana pale turbato ulojesko kasht san, haj kade rig kerdyilan le uloj kashteske rikitake,
na ashar tut pe kranzhi. Te asharesa, zhan avri, ke na tu phiravesla rikita, ba e rikita tut.
Shaj phenesas apol: „Tele phagline le kranzhi, man andre te tiknaren.”
Ova, von anda bipatyape phagerdyiline tele, ba tu kathar o patyape tordyos; na av apol phutyardo, ba dara.
Ke kana o Del chi jertisardas le kranzhenge, chi tuke chi jertila!
Dik apol le Devleski lashi rig haj lesko capenyipe! Pe kodal, kon pelinetar, o capenyipe, pe tute pale o lashipe, te ashosa ando lashipe – ke kaver falos vi tut tele shinena.
Ba te mukenatar penge bi patyamnimata, vi len mashkarutnenge kerena, ke le Devles siles saktimo, ke pale kasavenge te kerel len.
Ke tut avri te shindine anda turbato uloj kasht, haj ando lasho uloj kasht shutine tut andre, sodivar majfeder andre shona ande uloj kasht kodalen, kon vi kotharutne si?
Chi kamav, phralale, ke pe tumaro platnikipe te muken tumen, haj tena pinzharen kodi tajna, ke o korripe ande Izraeleski jekh rig pherdyilas andre, zhikaj kodo, zhikaj le murtikanengo butipe chi ushtyavel andre,
haj kade o intrego Izrael muntosardyola, sar Iskirime si:
„Avelatar o Slobodari anda Sion,
haj boldela kathar o Jakob o nasulipe.
Haj kado avla lenca muri konvencija,
kana lav lenge bezexa”.
Von kathar o evangeliumo dikhlines dushmanuraj pe tumari rig; ba kathar o avrialosaripe dikhlines zurales skunpuraj anda le dulmutanengi voja.
Ke o Del chi bunusarel peske dimata haj akharipe.
Ke sar varikana tume chi ashunenas pe Devleski vorba, ba akanak pale jertimata resline anda lengo bi muklipe:
zhikade akanak von bi mukle si anda tumaro jertipe, ke pala kodo vi von jertipe te resen.
Ke o Del sakones ando bi muklipe phandadas, ke pe sakoneste te jertisardyol.
Sosko baro si le Devleske barvalipesko, platnikipesko, haj zhanipesko milnope! Soske bi xutyilimaskej leske krisimata, haj avri na pinzhardej leske droma!
Ke kon pinzharelas le Rajesko gindipe?
Bake kon sas, kon vorba das les?
Bake kon das les majanglal,
ke palpale te trubujas te potyinel?
Ke sakofalo anda leste, pa leste perdal haj anda leste si. Luvudyipe leske sagutnes! Amen.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly