capitolul 1
Ke aba but zhene zumadepe, te phenen sa kodal trabi, save mashkar amende pecisardyiline,
sar vi phende amenge kodola, kon kathar anglipe dikhara haj slugara sas le alaveske,
la-sheske dikhlom vi me, zhi pala soste pe sakofaloste pala leste phirdom kathar o anglipe zhikaj o agor, tukhe, patyivale Teofil, tele te iskirisarav sogodi,
te pinzhares kodale trabengo chachipe, pe save tut sityardine.
Sas le Herodesheske, ande Judeaeke krajeski vrama jekh Zakariash anavesko rashaj, anda Abicka rashajengo grupo. Leski romnyi mashkar Aroneske sheja sas, haj Elizabetake akharenas la.
Solduj zhene chache sas angla o Del, haj patyivales trajinas kade sar o Raj vladisardas, haj mukhlas lenge.
Ba nasle shavoro, ke e Elizabet bi sumburaki sas, haj aba solduj zhene kaj e phurani vrama phirenas.
Pelaspe apol, kana ando grupo peski rashajicko butyi kerlas angla o Del,
haj sar kaj e rashaja sityilas t«avel, e avri ginavjimata leske das perdal e dhunimaski patyiv, andre gelas ande Rajeski khangeri,
zhikana sa le intregone manusha avral rudyinas ande lashasungako andre sikadyimatako chaso.
Atunchi sikadyilas leske le Rajesko andyelo, haj pe dhunimaske oltareski chachi rig tordyilas.
Kado dikhlines o Zakariash bari dikhlas, haj bari dar muklyosardyilas pe leste.
O Andyelo kado phendas leske: „Na dara Zakariash, ke ashundyisardyilas tyo rudyipe: tyi romnyi, e Elizabet, shavo anela pe luma tuke, haj lesko anav Jano-sheske phenesa.
Tyi lossh haj tyi voja avla voj tuke, haj but zhene loshshana pe lesko arakhadyipe.
Ke baro avla angla o Raj: mol haj matyarimaske pimata chi pela, haj aba ande peska dako per pherdyola Suntone Duhosa.
Mashkar le Izraeleske shave, but zhenen boldela karing pengo Raj, karing o Del.
Le Illesheska manoblesa haj zorasa phirla angla leste, ke le dadenge ile karing le shave te boldel, le bipatyamnen pale pe chachengo godyaveripe, haj kade le manushen angle te lasharel le Rajeske.”
Atunchi o Zakariash pushlas les: „Anda soste shaj zhanav sa kadal? Ke me phuro som aba, haj vi muri romnyi anglegelyi si aba ande peske dyesa.”
O andyelo kodo phendas leske: „Me o Gabriel som, kon angla o Del tordyuvav, haj anda kodo bishalde man, te dav duma tute, haj kadal losshane vorbi te anav tuke.
Ba aketa, mucisajves, haj chi zhanes te vorbis zhikaj kodo dyes, zhikaj kadal chi pecisardyon andre, ke chi patyajlan mure vorbenge, save ande pengi vrama andre pherdyona.”
Talakadi vrama le manusha zhukarenas le Zakariashes, haj chudinaspe, ke sosko butaig si andre ande khangeri.
Kana pale avriavilas, chi zhanelas te vorbil lende, haj hatyardine, ke sikadyipe dikhlas ande khangeri: voj pale sikadas lenge haj muto ashilas.
Kana pale nachiletar leske butyake vrami, palpale gelas ando kher.
Pala kadal dyesa e Elizabet, leski romnyi phari kerdyilas, haj garadyilas panzh shon, kodo phendes:
„Kado kerdas manca o Raj ande kadal dyesa, kana pe mande dikhlas, te lel muro lazhavjipe angla e manusha.”
O Del pale ando shovto shon bishaldas le Gabriel andyelos ande Galileako foro, saveske Nazaret si lesko anav,
kaj jekh sunto, savi jekhe mursheski piramnyi sas. Lesko anav Jozhef sas, anda Davidesko kher, la suntonako anav pale Marija.
Andre gelas late o andyelo, haj kade das duma: „Av drobome, gracijasa pherdo, o Raj si tusa.”
Daradas la kadal phenimata, haj las te gindilpe, ke sosko dyes dinipe si kado.
O andyelo pale majdur vorbilas: „Na dara, Marija! Gracija arakhlan kaj o Del.
Aketa, phari peresa haj shaves anesa pe luma, haj Jezusheske anavaresa les.
Baro avla voj, le Uchimaske Shaveske anavarna les: o Raj Del leske del leske dadesko, le Davidesko krajicko iskamin,
haj krajarla pe Jakobesko kher sagda, haj leske krajisaripeske chikana avla agor”.
E Marija pe kado kade das duma kaj o andyelo: „Sar shaj avlas kado, ke me murshes chi pinzharav?”
Pe kado o andyelo kado phendas lake: „O Sunto Duho hural pe tute, haj le Uchimaski zor ushajinarela tut, haj anda kado le Suntones, kon tutar arakhadyol, le Devleske shaveske anavarena.
Aketa, e Elizabet, tyiri lala, phari pelas pe peski phurimata haj shavo avlala, kon aba ando shovto shon si, voj, kas bi sumburake phenenas,
ke le Devleske khanchi naj bi shajipe”.
E Marija pe kado kodo phendas: „Aketa, le Rajeski slugoni shej, t«avel mange sar tye alava phenen.” Thaj nachilastar latar o andyelo.
E Marija pale las te dromarel ande kodal dyesa, haj sidyardines gelastar mashkar le plaja, ande Judeako foro.
Andre gelas ande Zakariashesko kher, haj dyes das la Elizabeta.
Haj kade pecisardyilas, ke kana e Elizabet ashundas la Marijako glaso, oprelosshajlas ande lako per o cino shavoro haj e Elizabet pherdyilas Suntone Duhosa.
Glasunes oprecipisardas: „Ashtyilime san tu mashkar le romnya, haj ashtyilime si tye truposko frukto!
Ba sar shaj pecisardyilas manca kado, ke mure Rajeski dej avel mande?
Ke aketa, kana ande mure kan opreashundyilas tyo dyes dinipe, oprelosshajlas ande muri utera o shavoro.
Haj anandoj, kon patyalas, ke andre pherdyola, so o Del phendas leske.”
E Marija pe kado kade das duma:
„Asharel muro duho le Rajes,
haj muro ilo losshal ande muro muntusari Del,
ke pe peski muklyona sluginya dikhlas.
Aketa, kathar kadi vrama
baxtajake phenla man sakone populara,
ke bari butyi kerdas manca o Baro,
haj Suntoj lesko Anav.
Lesko lashipe pe jekh po kaver popularo
hural, kon les daran.
Bare butya kerel peske kujeska zorasa,
rispisardas ande gindimata phudyarden.
Krajen tele shudas pa krajicko iskamin,
haj le cinen oprevazdas.
Le bokhalen andre pherdyardas sakone lashipenca,
haj shushes bishaldas le barvalen.
Oprezhutisardas peske slugas, le Izraeles,
chi serojindes pa lashipe,
sar so phendas amare dadenge,
le Abrahameske haj leske falonge sagda vramate”.
Haj e Marija late ashilas trin shon, pala kodo khere gelas.
Avilastar apol e vrama, e Elizabet t«anel pe luma le shavores, vi shavo kerdyilas.
Ashunde kado lake vechina haj lake nyamura, ke o Raj sosko baro lashipe kerdas lasa, haj kethanes losshanas lasa.
Pecisardyilas apol, ke po oxtoto dyes aviline krujal te shinen le shavores, haj pa lesko dad Zakariasheske kamline te anavaren les.
Ba leski dej kade das duma: „Chi sar, ke Janosh avla lesko anav.”
Pe kado kodo phendine: „Ba khonyik naj mashkar tye nyamura, kas kade anavaren.”
Pushline kade leske dades, ke sar kamel les te anavarel.
Voj pale iskirimasko skundo manglas, haj kadala vorbi iskirisardas opre: „Janosh si lesko anav.” Savorazhene bari dikhline.
Pe kado puterdyilas lesko muj haj leski shib, duma das, haj asharelas le Devles.
Bari dar das pe intregone vechina, haj kadala trabaki viaca avrizhanglyilas ande intrego Judeaeake plaja.
Sakon kon ashundine, ande pengo ilo garade kado, haj pushenas: „So avla anda kado shavoro” Ke le Devlesko vast sas lesa.
Lesko dad pale, o Zakariash, andre pherdyilas Suntone Duhosa haj kade profecisarlas:
„Ashtyilimej o Raj, le Izraelesko Del,
ke avilas haj muntusardas peske popularen.
Le muntusaripekso somno kerdas amenge,
le Davideske, ande leske slugasko kher,
sar so phendas peske Suntonge peske vushtenca,
kathar anglunipe le profetanca.
Muntusardas amen kathar amare dushmana,
haj sa anda kodalenge vast, kon xolyajven pamende:
ke lashimata te kerel amare dadenge,
haj te serosajvel pa sunto konvencija,
pa colax, savasa amare Abraham dadeske colaxardas,
ke dela amenge,
ke skepisajvas anda amare dushmanonge vast,
kade bi darimatasa shaj slugisaras leske,
ando Suntope haj chachipe angla leste
ande amare trajosko sako dyes.
Tut pale, shavore, le Uchimataske profetaske anavarena:
ke angla o Raj phiresa, angle te lashares lesko drom,
haj leske popularon pe muntuipesko
pinzharipe te sityares, pe lenge bezexjertimata,
anda amare Devlesko milno lashipo,
savesa avilas te dikhel amen voj ando uchipe opre ushtyindo,
ke fimlalipe te anel kodalenge,
kon ando tunyariko haj ande merimasko ushajin beshen,
haj amareushtyavjimata pe pachako drom te lasharel”.
O shavoro pale barardyolas haj zurardyolas ando duho, haj ande pusta sas zhikaj kodo dyes, zhikaj chi sikadaspe ando Izrael.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly