capitolul 1
O Pal, anda Jezush Kristosko kamipe akhardo aposhtolo, haj o Sostenes phral,
le Devleske korintushikana eklezhiake, ando Kristo Jezush suntosardenge, le akharde suntonge, sa kodalenca kethanes, kon po zhutipe akharen amare Rajesko le Jezush Kristosko anav, pe sako than, lende haj amende.
Gracija tumenge haj pachipe kathar o Del, amare Dadestar, haj kathar o Raj Jezush Kristo.
Sagda najisipe phenav mure Devleske anda tumende anda Devleski gracija, so davadyilas tumenge ando Jezush Kristo,
ke ande sakofaloste barvale kerdyiline ande leste, ande sako alav haj pinzharipe.
Ke le Kristosko chacharipe zurardyilas ande tumende,
kade si tume dosta gracijake dimata, zhi tala kodi vrama, zhikaj zhukaren amare Rajesko le Jezush Kristosko sikadyipe,
kon vi zurarela tumen zhikaj o agor, ke uzhe te aven pe amare Rajesko pe Jezush Kristosko dyes.
Chachoj o Del, pa kaste perdal akharipe resline leske Shavesko, le Jezush Kristosko, ande amare Rajesko kethanipe.
Mangav tumen, phralale, pe amare Rajesko, pe Jezush Kristosko anav, ke savorazhene zhikodo te phenen, haj tena avel mashkar tumende shindyipe, ba aven jekhtune haj jekh hatyarde zhiande kodi butyi.
Ke kodi viaca ashundom pa tumende, mure phral, kathar le Kloe khereske manusha, ke xape si mashkar tumende.
Pa kodo vorbisarav, ke mashkar tumende sakon kasave phenel: „Me le Palesko som”, „Me le Apollovesko”, „Me le Kefashesko”, „Me pale le Kristosko”.
Dore pe riga shindyilas o Kristo? Apol le Pales tannardine po trushul anda leste, bake ande Palesko anav sanle bolime?
Najisarav le Devleske, ke khanyikas chi boldom mashkar tumende, numa le Krispuses haj le Gajuses,
tena phenel vi varikon, ke ande muro anav sanle bolime.
Inke vi le Stefanaseske khereske manushen boldom: pa kadal kaver, chi zhanav, ke vi varikas te boldomas.
Ke na anda kodo bishaldas man o Kristo, ke te bolav, ba anda kodo, ke o evangeliumo te viacarav, na le vorbenge platnikipesa, ke le Kristosko trushul tena xasarel peski zor.
Ke o trushul alav si kodalenge, kon xasajventar, dilipej apol, ba kodalenge, kon muntusajven, kade amenge, le Devleski zor si.
Ke iskirime si:”Mudarav le platnikimasko platnikipe, haj le godyaverengo godyaveripe nacharav”.
Kaj si o platniko? Kaj si o iskiritori? Kaj si kadala lumako rodari? Apol na dilimatake kerdas o Del la lumako platnikipe?
Ke e luma peske platnikipesa chi pinzhardas opre le Devles ande lesko devluno platnikipe, kade fajlas le Devles, ke perdal pa alav-viacarako dilipe muntusarel le patyamnen.
Ke le bibolde somnura dorosaren, le hellena pale platnikimata roden,
ba ame le Kristos viacaras, kas po trushul tannardine, ba so le bibolden chi faj, le murtikanonge pale chaladipe si;
ba le akhardenge apol, le biboldenge haj le hellenonge jekhtunes, o Kristo si le Devleski zor haj le Devlesko platnikipe,
ke le Devlesko dilipe maj platnikoj kathar le manusha, haj le Devlesko slabipe maj zuraloj kathar le manusha.
Ke dikhen feri tumaro akharipe, phralale: na but si o platniko kathar o trupo, naj but o saktimo, naj but rajkano:
ba kodo, so kathar e luma dilimataj, kodo alosardas avri o Del, ke te lazhavarel tele le zuralen.
So kathar e luma telalutni si haj tele dikhli, kodal alosardas avri o Del: kodo, so khanchij, ke kodo so varisoj, te nacharel,
ke chi jekh manush tena asharel pes angla o Del.
Pa leste perdal san tume ando Jezush Kristo, kon kathar o Del amare platnikimaske, chachimaske, suntosardyimaske haj muntusardyimaske kerdyilas,
ke sar iskirime si:
„Kon asharelpe, ando Raj te asharelpe”.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly