capitolul 3
Sosko anglalipe si atunchi le biboldes? Bake soski hasna si le krujalshinipeske?
But, ande sakofaloste. Majanglal kodo, ke o Del pe lende muklas peske alava.
Ba kana varikon mashkar lende murtikana sas? Dore kodalengo murtikanipe chi shinel le Devlesko karing lende pashipe? Bater, na!
Boldines, o Del chachoj, te avel apol sako manush xoxamno, sar vi iskirime si: „Te patyan man chacheske ande mure vorbi, haj viktorno te aves, kana ande kris lena tut”.
Ba so te phenas pa kodo, kana amaro bi chachipe sikavela andre le Devleske chachipes? Naj bi chacho o Del, kana peska xolyasa marel? – Manushikanes vorbil.
Chi sar. Ke kaver falos sar krisarelas o Del la luma?
Ba kana le Devlesko chachipe perdal pa muro xoxavjipe butardyol ando luvudyipe, atunchi sostar marel man kodi kris, sar bezexasles?
Haj sostar chi kerasas nasul, ke lasho te kerdyol anda late, sosa vi dosharen amen unyizhene, haj pe amende xutyilen, ke ame kade vorbisaras? Kadalengo kushlipe chachikanoj.
Sar tordyol apol e butyi? Majbut sam dore lendar? Chi sar. Ke majanglal sikadam andre, ke le bibolde haj le hellena sa tala bezex si,
sar iskirime si:
„Naj chi jekh chacho manush;
naj kon hatyarel les, naj kon rodel le Devles;
savorazhene o nasul drom alosardine, haj
jekhtunes bi khanchikerde kerdyiline,
naj, kon lasho kerelas, naj chi jekh.
Lengo girtyano puterdo murmuntoj,
penge shiba xales bolden,
le sapengo mirgo si tala lenge vusht.
Armaja dinipesa haj kerkipesa si pherdo lengo muj.
Lenge punre sigaslej po ratmuklipe.
Bida haj bi baxtalipe si pe lenge droma,
haj la pachako drom chi pinzharen,
le Devleski dar naj angla lenge jakha”.
Ame pale zhanas, ke sa kodo, so e kris phenel, kodalenge phenel, kon tala e kris si, haj kade sakono muj te mucisajveltar, haj e intrego luma te resel tala Devleski kris!
Ke naj kodo manush, kon chachardyol angla leste perdal pa krisake trabi. Vi le bezexesko pinzharipe perdal pa kris si.
Akanak apol le Devlesko chachipe avrizhanardyilas, vi bi krisako. E kris haj le profeti chacharipe keren pa leste.
Le Devlesko chachipe perdal ando Jezush Kristosko patyape resen sa kodal, haj hural pe kodal, kon patyan ande leste: ke alosaripe naj.
Ke savorazhene bezexardine, haj naj lende le Devlesko luvudyipe,
haj kade chachardyon ive anda lesko gracijipe perdal pa muntusaripe, so ando Jezush Kristo si,
kas o Del bishaldas ushorimaske perdal pa patyape haj pa pesko rat, ke kade avri te sikavel pesko chachipe, zhiso majanglal toleralisardas le anglune vramake bezexa
le Devleske pachake toleranshipesa, ke avri te sikavel – phenav – pesko chachipe ande kadi vrama, haj voj chacho te avel, haj chacheske te shol kodales, kon anda Jezush Kristosko patyape si.
Kaj si apolal tyo asharipe? Khancheske kerdyilas. Anda savi kris? Pa kerdyimaski kris? Na, barem perdal pa patyapeski krisi.
Ke ame kade gindisaras, ke o manush perdal pa patyape chachardyoltar haj na kathar la krisake kerdyimata.
Bake o Del dore le biboldengoj numa, haj na vi le murtikanengo? Bater, vi le murtikanengo!
Ke zhikodo jekh Del si kodo, kon chachardyilineske kerel perdal pa patyape le krujalshindines, haj vi le bi krujal shindines perdal pa patyape.
Tele rumusaras la krisa perdal pa patyape? Na! Boldines: zuraras la krisa.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly