capitolul 1
Ande angluni hertija, Teofil, vorbisardom sa pa kodo, so o Jezush kerdas haj so sityardas zhikathar o anglalipe
zhikaj kodo dyes, pe savo oprelavadyilas, pala soste perdal pa Sunto Duho vladipe das peske aposhtolenge, kas avri alosardas.
Pala peske dukha zhuvindes sikadas pes lenge, haj bute somnonca chachardas lenge, ke trajil, haj inke shtarvardesh dyes sikadyilas, haj vorbilas pa Devlesko them lenge.
Kana kethane xalas lenca, phendas lenge, ke tena zhantar ando Jeruzhalemo, ba te zhukaren pe le Dadeski vorba: „Kodo ashundine mandar,
ke o Janosh numa pajesa bolelas, ba tume pa unyidyesa Suntone Duhosa bolardyona.”
Pe kado le kethaneaviline pushline lestar: „Raja, dore akanak tordyares po than le Izraeleske themes?”
Ba voj kodo phendass lenge: „Na tumari grizhaj te pinzharen le vrami haj le bersha, saven o Dad kathar pesko fajlipe kerdas.
Ba o Sunto Duho, so tele muklyadyol pe tumende, zorasa pherdyarela tumen, ke chacharipe te keren pa mande ando Jeruzhalemo haj ande intrego Judea, ande Samaria, zhikaj la phuvaki granica.”
Pala soste kadal phendas, haj angla lenge jakha oprevazdadyilas, haj noro sharadas les angla lenge jakha.
Haj sar dikhenas les, sar ando rajo zhalas, aketa, duj mursh tordyiline pasha lende ande parne gada.
Kade dine duma: „Galileicka manusha, sostar tordyon haj dikhen po cheri? Kado Jezush, kon oprelavadyilas pasha tumende, kade avelatar pale, sar ando cheri dikhlineles opre te zhal.”
Atunchi palpale geline ando Jeruzhalemo pa plaj, saves uloj kashtenge plajeske anavaren, haj savo kathar o Jeruzhalemo pekh savatonedyesesko phiripe si.
Kana andre resline, opregeline pe opralutni soba, kaj sityiline te nacharen e vrama: o Peter haj o Janosh, o Jakab haj o Andrash, o Filip haj o Tamash, o Bertalan haj o Mate, O Jakab, le Alfeusesko shavo, haj o Shimon o utsaro, haj palunes o Judash, le Jakabesko phral.
Kadal savorazhene, intregone duhosa avri inkrenas ando rudyipe le romnyanca, haj la Marijasa, le Jezusheska dejasa haj le nyamonca kethane.
Ande kodal dyesa opretordyilas o Peter mashkar le phral karing le shel thaj bish manusha sas kethane kothe –, haj kade das duma:
„Murshale, phralale! Andre trubuj te pherdyol le Iskiripeske, savo o Sunto Duho profecisardas le Davideske mujesa pa Judash, pa kodalenge anglalara, kon xutyildine le Jezushes.
Voj mashkar amende sas haj rig sasles anda kado slugipe.
Ba phuv kindas pe nasulimasko potyinipe, pala kodo opreumbladas pes, po duj shindyilas haj sa leske porra avriboldadyiline.
Kado avri zhanglas ando Jeruzhalemo sakon, kade kodola phuva pe lengi shib Hakeldameske, kaver falos phendo Ratmaleske anavaren.
Ke tele si iskirime ande Salmongi hertija:
»Lengo beshlimasko than te kerdyol pustoske,
haj tena avel, kon ande leste beshel«.
haj: »Le anglalutnaresko than
te davadyol kavereske«.
Kade apol trubul, ke mashkar kodal mursh, kon amenca kethane sas ande sakono vrama, kana o Raj Jezush mashkar amende phirelas,
zhikathar le Janoshesko bolaripe zhi kaj kodo dyes, kana oprelavadyilas mashkar amende, mashkar kadal varikon amenca kethane leske opretrajisarimasko chachari te avel.”
Avrialosardine apol dujen: le Jozhefes, kas Barzabasheske, pe lesko kaver anav Justuseske anavarenas, haj le Matyashes.
Pala kodo kade rudyinas: „Raja, kon sakonesko ilo pinzhares, sikav mashkar le duj le jekhes, kas avrialosardan,
ke perdal te lel kadale slugimaske haj aposhtolikane trabako than, saves o Judash kasave zhungales muklas, haj gelastar pe kodo than so perelpe leske.”
Pala kodo zheja cirdine pe lende, haj e zheja po Matyash pelas, kas mashkar le deshujekh aposhtolura line andre.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly