capitolul 5
Vi jekh Anaiash anavesko manush haj leski romnyi, kon Safira busholas phuv bikindine,
ba peska romnyake zhanglipesa choral inkerdas variso anda phuvako ahor, haj numa jekh rig andas haj shutas angla le aposhtolenge punre.
Ba o Peter kade das duma: „Ananiash sostar shutas ande zumavjimata o shatano tyo ilo, ke te xoxaves le Suntone Duhoske, haj xoxamnes palpale te inkres anda phuvako ahor?
Te ashilino, tuke ashilino, haj tu grizhosas kodalesa so bikindan. Sostar tromajlas apol pe kasavi traba te cirdadyol tyo ilo? Na le manushenge xoxadan, ba le Devleske!”
Kana o Ananiash kadal ashundas, kethane pelas haj mulas. Pe kado zurales bari dar xutyildas kodalen, kon kadal ashundine.
Le terne pale opreushtyiline, oprevazdine les, avri ingerdine les haj praxosardine les.
Dore pala trin chasura andre ushtyadas leski romnyi, kon chi zhanelas, ke so pecisajlas.
O Peter pushlas latar: „Phen mange romnyale, ta chachikanes pe kattyi bikindine la phuva?” Kodi kado phendas: „Ova, pe kattyi.”
Pe kado o Peter kado phendas lake: „Pe soste sas lasho kethane te vorbin pe kodo, ke te zumaven le Devleske Duhos? Aketa, kon praxosardine tye romes, kaj o vudar tordyon, haj vi tut avri ingren.”
Atunchi kethane pelas kaj leske punre haj mulas. Le terne pale andre ushtyiline, mules arakhline la, pe kado avri ingerdine la haj praxosardine la pasha lako rom.
Atunchi bari dar xutyildas la intregona eklezhia haj sa kodalen, kon kadal ashundine.
Kathar le aposhtolenge vast pale but somnura haj chudimata pecisajline mashkar le manusha. Savorazhene jekhe ilesa sasle kethane ande Shalamoneski kinda.
Mashkar kaverende khonyik chi tromajlas lenca te inkrel, ba e butimata pe bareste inkrelas len.
Ando Raj patyamne mursh thaj zhulyange butimata zurales bulyholas.
Le nasvalen avri ingerdine pe vujica, pe ingremaske patura shutine len, ke kana o Peter inytye zhal, numa lesko ushajin te resel varisaven, haj te muntosajven kathar pengo nasvalipe.
Haj inke vi anda kaver forura save pasha o Jeruzhalemo pashjonas, vi kothar zurales but zhene avenas, anenas le nasvalen haj kas le nasul duhura azbanas, haj kadal sa sastyiline.
Opretordyilas atunchi o angrashaj, haj sa kodal kon lesa sas – le sadducengo grupo –, haj pherdyiline xanzhvalipesa.
Xutyildine le aposhtolen, haj ande robija shudine len.
Ba le Rajesko andyelo ratyi avriputerdas la robijako vudar, avri ingerdas len, haj kado phendas:
„Zhantar, tordyon avri ande khangeri haj viacaren le manushenge o sityaripe pa kado trajo.”
Pala soste kado ashundine, kana zorilas andre geline ande khangeri haj sityarenas.
Kana reslas o angrashaj haj kon lesa sas, kethane akhardine le angsvatos, le Izraeleske shavenge sakone phuren, haj bishaldine ande robija te anenle angle.
Ba kana le slugi kothe resline haj avriputerdine la robija, chi arakhline len kothe. Palpale geline apol haj kado phendine:
„La robija mishto andre phandades arakhlam, haj vi le ketani kote tordyonas angla o vudar, ba kana andre puterdam, khanyikas chi arakhlam kothe.”
Kadi vorba ashundines bari dikhlas o angrashaj haj la khangerako ketanushicko vladari, ke so pecisajlas.
Atunchi avilas varikon haj avriphendas lenge: „Aketa le murshale, kas ande robija shudine, ande khangeri tordyon haj sityaren le manushen.”
Pe kado o vladari gelastar le sluganca, haj kade ke chi kerdas khanchi dosh ande lende andas len, ke daranas kathar le manusha, ke shudena len barrenca.
Pala kodo kothe ingerdine haj angla angsvato tordyardine len. O angrashaj pe lenge jakha shudas:
„Ande vladimata phendam tumenge, ke ande lesko anav tena sityaren, haj aketa, tume andre pherdyardine le intregone Jeruzhalemos tumare sityaripesa, haj pe amende kamen te shuden kodale manushesko rat.”
Pe kado o Peter haj le aposhtolura kado phendine: „Bethar trubuj le Devleske te mukas amen, sar le manushenge.
Amare dadengo Del opretrajardas le Jezushes, kas tume pekh kasht opretannardines mudardine.
O Del krajeske haj muntosareske vazdas les peske chache vastesa, ke bezexbunuimata haj bezex jertimata te del le Izraeleske.
Kadale trabenge ame zhanara sam, ame haj o Sunto Duho, kas o Del das sa kodalenge, kon muken pen leske.”
Kana kado ashundine opre xolyajline, haj pe kodo gindisardne, ke mudaren len.
Ba atunchi jekh Gamaliel anavesko farizano, kon angla e intrega manusha patyivalo haj kris zhanari manush sas, opretordyilas ando angsvato haj pe cerra vrama avribishaldas le manushen.
Pala kodo las te vorbil: „Izraelicka murshale, len sama pe tumende, ke so keren kadale manushenca!
Ke na dulmut angle ushtyilas o Teudash, haj kodo phendas pa peste, ke voj baro varikon si, haj pala kodo shtarshela mursh inkerdas lesa. Les mudardine, kodalen pale, kon patyanas leske, sa nashadine haj khanchi kerdyiline.
Pala leste kana sas o kethane iskiripe, angle ushtyilas o Galileicko Judash, haj peste pashardas le manushen. Vi voj mulas, haj kon jekh hatyarenas lesa, sa nashadine len.
Apolal me vi akanak kodo phenav tumenge: muken pe pende kadale manushen, haj muken len slobodo, ke kadi traba bake kerdyipe kathar le manusha si, nacholatar.
Ba kathar o Del te si, nashtig rumunles tele, tena pecisardyol kodo, ke le Devlesa maren tumen.”
Chachipe dine les.
Pala kodo angle akhardine le aposhtolen, maradine len, haj phendine lenge, ke chi sar tena vorbin ande Jezushesko anav, pala kodo bishaldine len.
Kodal pale losshanes gelinetar anda angsvato, ke dosta sasle pe kodo, ke anda Jezushesko anav marhimata te dukharen.
Haj china chi mukline ando dopash, ke sako dyes te sityaren ande khangeri haj khera haj te viacaren le Jezush Kristos.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly