capitolul 17
Pala kado perdal geline pa Amfipolis haj pa Apollona, pala kodo ande Tessaloniki resline, kaj le bibolden zhinagoga sasle.
O Pal sar sityilas andre gelas lende, haj tala trin savatone phenelas lenge o Iskiripe.
Avriphendas haj andre sikadas, ke le Kristoske trubusardas te dukharel, anda meripe opretrubusardas te trajil, haj ke „kado Jezush kodo Kristoj, kas me viacarav tumenge.”
Sas kon patyalas, haj pashardyilas kaj o Pal haj kaj o Silash, haj vi mashkar deldaramne murtikana but zhene, haj na cerra zhene mashkar le rajkane romnya.
Ba le bibolde daramne kerdyiline. Pasha pende line mashkar khanchikerde manusha unyi nasulen. Bida kerdine, haj oprexolyardine le foros, pala kodo kaj le Jazonesko kher kethane avilines kodo kamline, ke te anen len avri mashkar le manusha.
Ba ke chi rakhline len, anda kado le Jazones haj unyi phralen ingerdine angla foroske anglalara, haj kade cipinas: „Vi kathe aviline kadal, kon oprebolden la luma.
O Jazon pale peste las len, kana pale kadal sa le chasaroske dushmana si. Ke kodo phenen, ke varikon kaver, ke o Jezush si o kraj!”
Vi oprexolyardine le manushen haj le foroske anglalaren, kon kadal sa ashundine.
Ba vi kade slobodo mukline len, pala soste o Jazon haj le majbut avri tordyiline anda lende.
Le phral pale sigo inke ratyi bishaldine le Pales haj le Silashes ande Berea, kaj kana resline sigo andre geline ande biboldenge zhinagoga.
Kadal aba majlashe ileske sas, sar le tessalonicka. Vi andre xutyildine o alav sigo, haj pala jekh dyes pala kaver rodenas ando Iskiripe, ke kadal trabi dore chachikanes kade si.
Mashkar lende but zhene patyamne kerdyiline, haj inke vi mashkar le rajkane murtikana romnya haj mursh but zhene.
Ba kana ande Tessaloniki ashundine le bibolde, ke o Pal vi ande Berea viacarel le Devlesko alav, vi kathe avilinetar, haj vi oprexolyardine le manushen.
Pe kado le phral sigo dromeske bishaldine le Pales, te reseltar zhikaj e mara: ba o Silash haj o Timoteush kothe ashiline.
Kon ingerdine le Pales, geline lesa zhikaj Athenesko foro, pala kodo dromardinetar, kana vladipe line lestar pe Silasheski haj Timoteusheski rig, ke sar zhanen te zhan leste.
Zhikaj o Pal ando Athen zhukarelas pe lende, lesko duho dukhajlas, kana dikhlas, ke sar kamen le fetishon ande kado foro.
Xalaspe le biboldenca haj le deldaramnenca ande zhinagoga, haj vi pe forosko mashkarutno placco pala jekh dyes pala kaver kodalenca, kon kothe sas.
Unyi epikureusho haj stoikusho platniko xanaspe lesa. Sas kon kado pushenas: „So kamel te phenel kado vorbabutari?” Kavera pale: „Nyeve Devlenge viacareske dichol” – ke le Jezushes haj le opretrajipe viacarelas lenge.
Pala kodo xutyildine les, haj po Areopaguso ingerdine les, kadale vorbenca: „Dore shaj zhanas avri, ke so si o nyevo sityaripe, so viacares?
Ke variso nyevjardo phenes ande amaro kan, apol kamas te zhanas, soj kadal.”
Ke le intrega Athenicka haj le majbut manusha khanchesa chi grizhonaspe, numa kodolesa, ke variso nyevo te phenen bake te ashunen.
O Pal pale opretordyilas po Areopagusesko mashkar haj kade das duma: „Athenicka murshale! Ande sakono rig dikhav ke zurales patyan.
Ke kana krujal phirdom haj dikhlom tumare fetishon, pe kasavo oltaro rakhlom, pe soste kado sas opreiskirime: »Le bi pinzharde Devla.« Apol, kas tume chi pinzharen haj vi kade patyivinles, kodo viacarav me tumenge.
O Del, kon la luma kerdas, haj ande late sakofalo – ke voj si le rajosko haj la phuvako raj –, chi beshel ande kasave khangera, saven vast vazdas opre.
Les chi trubul kathar manusheske vastengo slugipe, sar vi variso te trubulas les, haj ke voj del sakono trajo, duho haj sakofalo.
Lesko kerdyipe si, ke kathar jekh falosarde manusha trajin pe intrego phuv. Voj kerdas, ke sode vrama te ashon sode te trajin,
ke te roden le Devles, shajke hatyarena haj rakhena les – ba naj dur mashkar amende chi jekhestar.
Ke ande leste trajisaras, mishkisajvas haj sam, sar vi tumari jekh poeta phendasla:
»Leske shavora sam.«
Ke apol le Devleske shavora sam, chi trubuj kodo te gindisaras, ke o Del kasavoj sar o somnakaj, bake rup, bake barr, haj cirdel pe articka kathar manusha avrigindisarde butya.
O Del toleralisardas kadala bi zhanimataki vrama, ba kanak aba viacarel, ke savorazhenenge bezexbunuimata trubuj te inkras kaj sako than,
ke avri shutas jekh dyes, pe savo krisipe kerla pe luma ando chachipe perdal pa jekh mursh, kon pacha kerela, haj vi chachardas angla sakoneste, kana opretrajardas les anda o meripe.”
Kana pa mulengo opretrajipe ashundine, sas kon prassalas, kavera pale kodo phenenas: „Pa kado inke jokhar ashunasa tut.”
Kadalesa o Pal gelastar mashkar lende.
Ba unyi manusha pashardyiline leste haj patyamne kerdyiline, mashkar lende o Areopagicko Denesh, haj inke jekh Damaris anaveski romnyi, haj lenca kethanes vi kavera.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly