capitolul 14
Aven kamimaske, roden le duhoske dimata, haj majfeder pale kodo, ke te zhanen te profetalin.
Ke kon pe shiba vorbil, na le manushenge vorbil, ba kathar o Duho vorbil tajnicka butya.
Kon pale profetalil, le manushenge vorbil, pe lengo mishtyipe, haj ushoripe.
Kon pe shiba vorbil, pe pesko mishtyipe kerel: ba kon profetalil, la eklezhiake kerel kodo.
Fajas man apol, ke savorazhene te vorbinas pe shiba, ba majfeder kodo, te profetalin, ke majbaro si kodo, kon profetalil, sar kon pe shiba vorbisarel, atunchi, kana avriphenel kodo vi uzhes, pe eklezhiako mishtyipe.
Kade apol phralale, tumende reslinos pe shiba te vorbisaros, so mishtyipe keros tumenge, kana chi vorbisaros tumende avri sikadyipesa bake pinzharipesa, profecipesa bake sityaripesa?
Ke vi le bi trajisarde bashavjimata, sar e bansuri bake citera, kana chi den kaverfalo glaso, sar shaj pinzharen opre la bansura bake la citera?
Haj kana o thur bichacho glaso del, kon zhala po larimo?
Kade vi tume, kana pe shiba vorbisardes uzhi vorba chi phenav, sar hatyarena atunchi, ke so phenen?
Ke kasave but shiba si pe luma, haj chi jekh naj bi hatyarde.
Apol kana chi pinzharav so phenel e vorba, streno avo kodaleske, kon vorbil, haj vi kon vorbil streno avla mange.
Kade vi tume, ke duhikane dimata kamen te resen, aven pe kodo, ke pe eklezhiako mishtyipe te barvajven.
Zhi anda kado, kon pe shiba vorbisarel te rudyil, ke vi te phenel avri uzhes kodo.
Ke kana pe shiba rudyisarav, muro duho rudyil, ba muro hatyaripe bi fruktoskoj.
So avel avri anda kado? Te rudyisarav vi ando duho, ba te rudyisarav vi hatyaripesa; te gilybav vi ando duho, ba te gilyabav vi hatyaripesa.
Ke kana numa ando duho phenes najisipe, kon kothe si bi zhanipesko, sar shaj phenel pe tyo najisipe, ke „Bater”, kana chi zhanel, ke so phenes?
Ke chaches, tu shukares des najisipe, ba o kaver chi mishtyisajvel pe late.
Najisipe dav le Devleske, ke savorazhenendar majfeder vorbisarav pe shiba;
ba ande eklezhia barem kamav panzh vorbi godyaverikanes te phenav, ke vi kaveren te sityarav, sar deshmiji vorbi pe shiba.
Phralale, ande godyaverikane butya na aven shavora, aven barem ando nasulipe shavora: ba ande godyaverikane aven oprebariline.
Iskirime si ande kris:
„Pe strene shiba haj strenenge mujesa
vorbisaro maj kaj kado popularo,
ba chi kade chi ashunen pe mande” – |phenel o Raj.
Apol kana pe shiba vorbin na le patyamnenge si kodo mishtyipe, ba le bi patyamnenge; o profetalipe pale na le bi patyamnenge, ba le patyamnenge.
Apol kana kethane avel e intrego eklezhia, haj savorazhene pe shiba vorbina, kana bi zhanipeske bake bi patyamne te ushtyavena andre, dore na kodo phenena, ke dilyajline?
Ba kana savorazhene profetalina, haj andre ushtyavela jekh bi patyamno bake bi zhanipesko, kodaleske sakon pe lesko duho vorbila, kodales sakon krisarela,
leske ileske tajni avrizhanardyona, kade ke po muj burdosardines luvudyisarela le Devles, haj avriphenela: „Chachikanes mashkar tumende si o Del”.
So avel avri anda kado, phralale? Kana kethane aven, haj savorazhenen si salmo, si sityaripe, si avrisikadyipe, si shibake dimatipe, si hatyaripe: sakofalo pe tumaro mishtyipe te kerdyol.
Kana pe shiba del duma varikon, duj bake trin zhene te vorbin, pala jekhavreste, jekh pale te hatyaravel kodo.
Tena naj kon hatyaravel, atunchi te ashol ande eklezhia: te vorbil peske haj le Devleske.
Le profeti pale dujzhene bake trinzhene te vorbin, le majbut pale te krisaren len.
Kana pale kaver, kon kothe si resel avrisikadyipe, o majangluno te asholtar.
Ke pala jekhavreste savorazhene shaj profetalin, ke savorazhene te sityon, haj zuralipe te resen.
Le profecimasko duho telalutnarelpe le profetaske.
Ke o Del na le kethane boldipesko Del si, ba le pachipesko.
Sar vi ande suntonge intrega eklezhija,
le romnya tena vorbin pe kethane avlimata, ke naj slobodo lenge te vorbisaren; ba te aven muklane, sar vi e kris phenel.
Kana pale kamen te sityon variso, te pushen khere penge romen: ke chi perelpe le romnyange te vorbisaren pe kethane avlimata.
Dore tumendar avilas le Devlesko alav, bake feri tumende reslas?
Kon profetaske bake duhikane manusheske inkrel pes, te hatyarel, ke so tumenge iskirisarav, kodo le Rajesko vladipej.
Kana pale varikon chi pinzharelles andre, atunchi chi les chi pinzharenatar.
Anda kado, apol mure phral, profetalisaren, haj muken vi pe shiba te shaj vorbisaren.
Ba sakofalo patyivales te pecilpe.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly