capitolul 10
Chi kamav, ke te bistren kodo, phralale, ke tumare dada savorazhene tala o noro sas, haj savorazhene perdal geline pa mara,
haj savorazhene bolardinepe perdal pa Mozesh ando noro haj mara.
Savorazhene zhikodo duhikano xamasko xanas,
haj savorazhene zhikodo duhikano pimo penas, ke piline anda kodo duhikano plaj so palalende zhalas: o plaj pale o Kristo sas.
Ba ande majbutende chi arakhlas voja o Del, ke muline ande pusta.
Kado pale amenge anglune pecimaske kerdyilas, ke ame tena dorosaras o nasul, sar von dorosardineles.
Chi fetisha kamle na kerdyon, sar unyizhene mashkar kodal, sar iskirime si: „Tele beshlas o popularo te xal haj te pel, haj opreushtyiline te khelenpe”.
Haj tena marhisaras amen, sar unyizhene marhinsardine pen mashkar kodal, haj tala jekh dyes bishtajtrin miji zhene muline.
Chi le Kristos na zumavas, sar kon unyizhene zumadine les mashkar kodal, haj xasajlinetar kathar le sapa.
Chi te xolyajven na xolyajven, sar unyizhene xolyajline mashkar kodal, haj xasajline kathar o pustisari.
Sa kadal anglune pecimaske kerdyiline amenca, haj anda kodo iskirisardineles tele, ke te sityuvas anda leste ame, kaste la vramako agor pashardyilas.
Kon apol kodo gindil, ke tordyol, te lel sama, tena pereltar.
Kathar manusheski zor majbaro zumavjipe inke chi reslas tumen. O Del chachoj, haj chi mukel kodo, ke opral pa tumari zor te dukhadyon zumavjipe, ba le zumavjipesa kethanes vi o slobodipe del tumenge, ke te zhanen perdal te trajin les.
Anda kado mure kamade, krujin le fetishongo kamipe.
Kade dav duma tumende, sar kaj godyavera manusha: krisaren tume, ke so phenav:
Le ashtyilimasko taxtaj, so ashchilisaras, na amaro ande Kristoske ratesko rigipe si? Haj o manro, so phagas, na amaro ande Kristosko truposko rigipepe si?
Ke jekh manro, jekh trupo sam but zhene, ke savorazhene anda jekh manro rigajvas.
Dikhen le trupostarutno Izraeles: kon le sarkafimura xal, apol ando kethanipe si le oltarosa?
So kamav kadalesa te phenav? Dore kodo, ke le fetishonge sarkafimasle masa bake o fetisho kerel variso?
Na! Ba so le murtikana sarkafimosaren, kodo le demonenge sarkafimosaren haj na le Devleske. Chi kamav, ke le demononca te aven ando kethanipe.
Nashtig pen le Devlesko taxtaj haj le demonengo thaxtaj. Nashtig aven rigasle le Devleske mesalyake haj le demonenge mesalyake.
Te xolyaras dore po daramnipe le Rajes? Dore maj zurale sam lestar?
„Sosko slobodoj”, ba na sakofalo hasnisarel. „Sakofalo slobodoj” ba na sakofalo avla po oprevazdipe.
Khonyik tena rodel pesko, ba kodo, so kavereskoj.
Sakofalo, so pe masesko foro bikindyol xanles, kade, ke vi variso te pushenas anda duho hatyarimaske butya.
Ke le Devleskij e phuv haj kodalako intregonipe.
Kana varikon mashkar le murtikana akarela tumen haj vi kamen te zhantar, sakofalo xan, so xaben angla tumende shon, kade, ke vi variso te pushenas anda duho hatyarimaske butya.
Ba kana varikon kodo phenel tumenge: „Kado anda fetishege sarkafimosarde butya si”, na xanles anda kodo, kon vazdas e vorba, haj anda duho pushlipe;
Na tyire duhoske hatyarimata phenav pe kado, ba le kaveresko. Sostar te krisarel muro slobodipe kaveresko duhosko hatyaripe?
Kana me najisipesa resardyuvav, sostar te kushel man varikon anda kodo, anda soste najisipe phenav?
Apol te xana, te pena, haj zhikaver te kerena, sakofalo pe Devlesko luvudyipe keren.
Na keren kasavo anda soste shaj xolyajven le bibolde, haj le hellena, haj chi le Devleske eklezhiake,
sar vime ande sakofaloste sakoneske leski voja kerav, na kodo rodindes, so mange lashoj, ba kodo so le majbutenge, ke te muntosardyon.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly