capitolul 4
O Jezush pale pherdosardo kathar o Sunto Duho palpale avilas kathar o Jordano, haj o Duho ande pusta ingerdas les
pe shtarvardesh dyes, haj zumavelas les o beng. Ande kodal dyesa chi xalas khanchi, haj kana kadal nachiline bokhajlas.
Atunchi o beng kado phendas leske: „Le Devlesko Shavo te san, phen kadele barreske, te kerdyol manreske.”
O Jezush kado phendas leske: „Iskirime si: »Na numa manresa trajil o manush«”.
Pala kodo opreingerdas les pekh ucho plaj, haj sikadas t«alakh minuto, la phuvake savore themen,
haj kade das duma o beng: „Sa kado saktimo haj kadaleski luvudyimata tuke dav, ke muro si, haj kaske kamav, kodaleske dav les:
apolal tu man te devlaresa, sa tyire avna.”
O Jezush kado phendas leske: „Iskirime si: »Le Rajes, tye Devles kam anda chacho ilo, haj feri leske slugisar«”.
Pala kodo ando Jeruzhalemo ingerdas les, haj pe khangeraki majopralutni rig tordyardas les, haj kodo phendas leske: „Le Devlesko Shavo te san, shude tut tele kathar.
Ke iskirime si:
»Peske andyelonge vladisarel te len sama pe tute«,
haj »pe penge palmi ingrena tut,
ando barr tena malaves tyo punro«”.
O Jezush kado phendas leske:
„Ba vi kodo phendine:
»Na zumav le Rajes, tye Devles«”.
Kana sa kadal zumavjimata agorisardyiline, o beng mukhlas les pekh vrama.
O Jezush ande Duhoski zor palpale gelas ande Galilea, haj leski viaca avri zhanglyilas ande intrega gava.
Sityarelas ande lengi zhinagogi, haj sakon asharelas les.
Pala kodo gelastar ando Nazaret, kaj oprebarilas. Sar so sityilas andre gelas savatone ande zhinagoga, haj opretordyilas te ginavel.
Kothe dine leske le Izajash profetaske hertiji. Kana avri puterdasla, pe kodo than arakhlas, kaj kado si iskirime:
„Le Devlesko Duho si pe mande:
anda kodo makhlas man opre,
ke lashi viaca te ingrav le chorrenge,
bishaldas man, slobodimata te phenav le phanglenge
haj dikhipe le korrenge, ke slobodeske te mukav le phagerdinen,
haj te viacaran le Devlesko skunpo bersh”.
Pala kodo kethane suchilisardas e hertija, palpale dasla le slugaske, haj tele beshlas. Ande zhinagoga skon pe leste dikhelas.
Voj pale las te vorbil karing lende: „Adyes pherdyilas andre o iskiripe pe tumare kanengo ashunipe.”
Savorazhene chachipe dine les, haj chudinaspe pe gracijake alava, save andalesko muj avnas. Pala kodo kade dine duma: „Na le Jozhefesko shavo si kado?”
Voj kado phendas lenge: „Dore kodi parabola phenena mange savo kodo phenel: »Sastyari, sastyar tut! So ashundam, ke so pecisajline ando o Kafarnaumo, ker kodala vi kathe, ande tyiro them.«”
Pala kodo kade vorbilas maj dur: „Amen, phenav tumenge, ke chi jekh profeta naj skunpo ande pesko them.
Amen, phenav tumenge: but phivlyi sas ande Illesheske dyesa ando Izrael, kana andre phandadyilas o cheri pe trin bersh haj pe shov shon, kade pale bari bokh kerdyilas pe intrego phuv:
haj dikhen mashkar kodal khanyikaste chi bishaldine le Illeshes numa kaj jekh phivlyi ande Sidone Sarepta.
Haj but leprale sas ando Izrael ande Elizeushe profetaski vrama, ba mashkar kodal khonyik chi uzhilas, numa o siricko Naman”.
Kadalen ashundines sakon zurales oprexolyajline ande zhinagoga.
Opreushtyiline, avri ingerdine les anda foro, haj opreingerdine les pe kodale plajeski rig, kaj so lengo foro tordyolas, tele te shuden les.
Ba voj perdal nakhlas mashkarlende haj gelastar.
Pala kodo tele gelas ando Kafarnaumo, ande Galileako foro, haj kothe sityarelas len savatone.
Bari dikhenas pe lesko sityaripe, ke leske phenimata saktimosa sas pherdyarde.
Sas ande zhinagoga jekh manush, ande kaste nasul biuzho duho beshelas. Kado bare glasosa oprecipisardas:
„De man pacha! So grizha si amen tute, Nazareticko Jezush? Anda kodo avilan, te xasares amen? Zhanav, kon san: le Devlesko Sunto.”
Ba o Jezush vladisardas leske: „Mucisardyu, haj zha avri anda leste!” O beng pale mashkaral shudas le manushes, avrigelas anda leste, haj khanchi dosh chi kerdas leske.
Sakon zurales darajlas, haj mashkar jekhavreste kade vorbinas: „Soski vorba si kadi? Saktimosa haj zorasa vladisarel le biuzhe duhonge, haj kodal avrizhantar?”
Haj leski viaca avri zhanardyilas ande intregone gava.
Pala kodo opretordyilas, haj anda zhinagoga ande Shimonesko kher gelas. Le Shimoneski sokra zurales javrali sas. Duma dine anda late.
Voj pale kothe tordyilas pasha late, vladisardas le javripeske, pe soste kodo vi muklas la. E romnyi sigo opreushtyilas, haj slugisardas leske.
Kana apol o kham tele nakhlas, sa kodala, kas nasvale sasle, kothe ingerdine len leste, haj voj pe savorazhenende opreshutas pesko vast haj sastyardas len.
Anda but zhene avri gelas vi o beng, haj kado cipinas: Tu san le Devlesko Shavo.” Ba voj pe lende vladisardas, chi muklas len te vorbin, ke zhanenas, ke voj si o Kristo.
Kana zorisardyilas, avrigelas haj cirdaspe pekh garado than. Ba e butimata radelas les. Kana rakhlas les, palpale astarenas les, tena zhaltar lendar.
Ba voj kado phendas lenge: „Vi kavere foronge trubuj te viacarav le Devleske themeski losshani viaca, ke anda kado bishaldine man.”
Haj sityarelas ande Judeake zhinagogi.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly