capitolul 17
Pala kodo kade das duma kaj peske sityarde: „Nashtig avel kodo, ke bidi tena pecisajven, ba jaj kodaleske, kon kerel kodalen.
Majmishto avlas kodaleske, barr te phandenas ande leski kor, haj ande mara te shudenas les, sar te kaldosarel vi jekhes mashkar kadal cinora.
Lensama pe tumende!
Pa jertipe Te bezexarela tuke tyo phral, de pe leste duma: haj te bunujala, atunchi jertin leske!
Inke vi atunchi, kana andekh dyes eftavar bezexarela, haj sako dyes eftavar zhala palpale tute, haj kado phenla: »Bunusarav!«- jertisar leske.”
Le aposhtolura atunchi kado phendine le Rajeske: „Barar ande amende o patyape!”
O Raj kado phendas pe kado: „Kana numa kabor patyape avla tumen, sar jekh sinap sumburo, haj kadale dudenge kashteske kodo phenena: »Shindyosar avri zhikathar e buchuma haj mukh rikita ande mara!«, mukela pe tumenge.
Kon phenel mashkar tumende peske slugaske, kana pala plugimata khere avel pa mal: »Avtar sigo, besh kaj e mesalya?«
Barem na kodo phenel leske: »Ker mange xaben, brichinar tut opre haj slugisar man avri, zhikaj xav haj pav, pala kodo shaj xas haj shaj pes vi tu«?
Apolal chi najisil le slugaske, ke kerdas sa kodola, so vladisardas leske?
Kade vi tume, kana sakofalo kerena so vladisarde tumenge, phenen: »Khanchi kerde slugi sam, numa kodo kerdam, so amari butyi sas!«”
Pelaspe apol, ke kana karing o Jeruzhalemo zhalas, perdal gelas pa Samaria haj Galilea.
Kana andre gelas andekh gav, mostar leske avenas desh leprale mursh. Rigate tordyiline,
haj glasunes cipinas: Jezush, Maistro! Gracijisar p«amende!”
Kana dikhlas len, kodo phendas: „Zhantar, sikaven tumen le rashajenge!”. Haj kade pecisardyilas, ke sar zhanas, uzhilisajline.
O Jekh mashkar lende, kana dikhlas, ke sastyilas, palpale gelas, haj glasunes luvudyilas le Devles,
haj angla Jezusheske punre pe pesko muj burdosardes najisilas leske: haj kado samaricko sas.
O Jezush pale kade das duma: „Haj na desh zhene uzhiline? Le majbut ijja kaj si?
Nas kaver, kon palpale avilino, te luvudyisarel le Devles, feri kado streno?”
Pala kodo kade das duma leste: „Ushtyi opre haj zhatar: tyo patyape sastyardas tut.”
Kana le farizana pushline lestar, ke kana avlatar le Devlesko them, kado phendas lenge: „Le Devlesko them ch«avlatar sar dikhlimata.
Chi phenena: »Aketa, kathe si,« bake »kothej«. Ke le Devlesko them mashkar tumende si.
Le sityardenge pale kado phendas: „Avna dyesa kana fajas tumen le Manusheske Shavesko vi jekhtuno dyes te dikhen, ba chi dikhena les.
Kana kodo phenena tumenge: »Aketa, kathe si«, aketa, kothe si«: na zhantar haj na nashen kothe.
Ke sar o fimlalo shtrafin savo perdal dichol pa chereski jekh rig po kaver, kasavo avla vi le Manusheske Shavo pe pesko dyes.
Ba majanglal inke but trubuj te dukharel, haj trubuj te mudarel les kadal populara.
Sar ande Noeveske dyesa pecisajline, kade avla vi ande Manusheske Shaveske dyesa.
Xanas, penas, ansurinas haj romeste zhanas zhikaj kodo dyes, pe savo o Noe andre gelas ando bero. Pala kodo avilas le barepajesko shordyipe, haj sakofalo mudardas.
Haj zhikade, sar ande Loteske dyesa pecisajlas: Xanas, penas, kinenas thaj paruvenas, beshavnas, vazdenas.
Haj kodo dyes kana o Lot avri gelas anda Sodoma, jag haj shtrafina perenas anda cheri haj mudardas sakones.
Kade avla vi kodo dyes kana le Manushesko Shavo dichosajvela.
Kon kodo dyes pe kheresko opralutnipe avla, haj leske butya ando kher, tena avel tele pala lende, te ingrel len: haj kon pe mal avla, tena avel khere.
Serosaren pe Loteski romnyi.
Kon kamel te muntusarel pesko trajo, xasarel kodo: kon pale xasarel les, muntusarel kodo.
Phenav tumenge: Kodi ratyi dujzhene avna ande o pato: Jekhes oprelena, le kaveres kothe mukena.
Duj romnya morel jekharsa: jekha oprelena, la kavera kothe mukena.
Dujzhene avna pe mal: jekhes opre lena, le kaveres kothe mukhena.”
Pe kado pushline lestar: „Kaj avla kado, Raja?” Voj kodo phendas lenge: „Kaj trupo si, kothe huran vi le akvilnura.”
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly