capitolul 23
Atunchi savorazhene oprelinepe, haj ingerdine les kaj o Pilatush.
Kothe kade line te dosharen les: „Kodo lam sama, ke kado xoxavel amare popularen, nashtil, taksha te potyinas le chasaroske, haj kodo phenel pa peste, ke voj si o Messhiashicko kraj.”
O Pilatush pushlas lestar: „Tu san le biboldengo kraj?” Voj kodo phendas: „Tu phenes.”
O Pilatush atunchi kado phendas le angrashajenge haj le butimatange: „Khanchi bezex chi arakhav ande kado manush.”
Ba kodal zurarnaspe, haj kodo phendine: „Opre xolyarel le manushen peske sityaripesa ande intrego Judea, zhikathar e Galilea zhikaj kadal riga.”
Kadal ashundines o Pilatush pushlas, ke kado manush dore na Galileickoj.
Kana avrizhanglas, ke tala le Herodeshesko krajipe inkerdyol, bishaldas les kaj o Herodesh, kon vi voj ando Jeruzhalemo sas ande kodal dyesa.
Kana o Herodesh dikhlas le Jezushes, zurales losshajlas. Aba dulmut fajlino les te dikhel les, ke ashundas pa leste, haj sperantilas, ke varisoski chudimata kerla angla leste.
Butaig pushelas les, ba voj khanchi chi phenelas.
Le angrashaja haj le iskiritora pale kothe tordyonas, haj inke majfeder dosharenas les.
O Herodesh peske krujal line manushenca kethanes tele lazhavardas les, avriprassadas les, pala kodo ande parne gada uradas les, haj palpale bishaldas les kaj o Pilatush.
Pe kodo dyes o Herodesh haj o Pilatush lashe vortakura kerdyiline, ke angla kodo ande xolyate sas jekhavresa.
O Pilatush pale kethane akhardas le angrashajen, le popularenge anglalaren haj le manushen,
haj kodo phendas lenge: „Kathe andine mande kadale manushes, sar le manushenge rebellishes. Avriashundom les angla tumende, ba khanchi bezex chi arakhlom ande kado manush sa mashkar kodola, sosa dosharen les.
Haj inke chi o Herodesh, ke palpale bishaldas les amende. Shaj dikhen apol, ke khanchi merimaski traba chi kerdas.
Krisarav les anda kado, haj slobodo mukhav les.”
Pe kado savorazhene oprecipisardine: „Xasar kadales, haj mukh amenge le Barabashes!
Les anda varisoske rabellimata haj mudaripe phandadine ande robilya, so ando foro pecisardyilas.
O Pilatush pale duma das lende, ke slobodo kamlas te mukhel le Jezushes.
Ba kodal cipinas: „Po trushul, po trushul lesa!”
Ba voj vi po trito duma das lende: „Ba apol so nasul kerdas? Khanchi merimaski traba chi arakhlom ande leste. Krisarav les apol haj bishalav les”
Ba kodal chi mukhenaspe, ba inke majfeder mangenas, te tannaren les po trushul. Lengo cipipe po jekh zurajvelas.
O Pilatush anda kado kade alosardas, t«avel kade, sar so kamen.
Sar so mangle les, slobodo mukhlas kodo les, kas anda rebellimata haj anda mudarimata phandade ande robilya, le Jezushes pale avridas lenge sar so kamenas.
Kana ingerdine les, xutyildine jekhe Shimon anaveske manushes, kon anda Cirene sas, kon pa mal avelas, haj pe leste shutine o trushul, te ingrel les pala o Jezush.
But manusha zhanas pala leste, sas mashkarlende vi romnya, kon rovenas haj cipinas anda leste.
O Jezush kothe boldaspe karing lende, haj kade das duma: „Jeruzhalemeske shejale, na anda mande roven! Tumen haj tumare shavoren rovjaren!
Ke avnatar kasave dyesa, kana kodo phenena: »Anandej kas nashtig avel shavoro, le dejange utera, save chi andine shavores pe luma, haj le chucha, save chi pijadine!«
Atunchi kodo lena te phenen le plajenge: »Shindyon p«amende!« Haj le dunenge: »Sharaventar amen!«
Ke kana le zelenisarde kashtesa kado keren, atunchi so avla le shukeskiresa?”
Lesa jekharsa ingerdine vi duje bezexaslen, te mudaren len.
Kana kaj e Koputa thaneske anavardino than resline, po trushul tannardine les kothe, haj lesa kethanes vi le duje bezexaslen, le jekhes pa chachi rig le kaveres pa stungo rig.
O Jezush atunchi kade das duma: „Dade! Jertisar lenge, ke chi zhanen, ke so keren.”
Leske gada uladine, haj avrikheldinele.
Le manusha numa dikhindes tordyonas kothe, le angmanusha pale kade prassanas les: „Kaveren muntusardas, te muntul akanak pes, voj te si o Kristo, le Devlesko alosardo!”
Vi le ketani prassanas les. Kothe zhanas, haj shut denas les,
haj kodo phenenas: „Tu te san le biboldengo kraj, slobodisar avri tut!”
Vi opreiskiripe sas pe lesko trushul: „Kadoj le biboldengo kraj.”
Mashkar le bezexasle jekh kushelas les: „Na o Kristo san tu? Slobodisar avri apol tut, haj vi amen!”
Ba o kaver tele lazhavardas les kadale vorbenca: „Chi daras kathar o Del? Haj ke vi tu zhikodo krisaripe dukhares!
Amenge perelpe, ke anda amare trabi chachimasko krisaripe dukharas, ba kado kathe khanchi nasul chi kerdas.”
Pala kodo kade das duma: „Jezush, serosartu pa mande, kana avesatar ande tyo them.”
Voj kodo phendas leske palpale: „Amen, phenav tuke: inke adyes manca avesa ando paradajzo!”
Karing le shov chasura tunyarikipe kerdyilas pe intrego luma, zhikaj ijja chasura.
O kham kajilastar, la khangerako firhango mashkaral shindyilastar.
O Jezush atunchi glasunes oprecipisardas: „Dade! Ande tyo vast shav muro duho!” Kadale vorbenca avri phurdas pesko dyi.
Kana o shelari dikhlas, so pecisajlas, luvudyisarlas le Devles, haj kade das duma: „Kado manush chachikanes chacho sas.”
Sa e intrego butimata, save kethane aviline, e pecimata dikhlines penge kolyina mardines khere geline.
Le Jezusheske sakone pinzharde, haj le romnya, kon anda Galilea aviline pala leste, majdur, rigate tordyindes dikhenas sa kado..
Sas jekh Jozhef anavesko, patyivalo haj chacho manush, anda angsvato,
kon chi hatyarlas jekh lenge krisimatasa haj lenge kerdyimatanca. Anda Arimateako foro sas kaj but bibolde beshenas, haj vi voj azhukarlas le Devleske themes.
Gelastar kaj o Pilatush, haj manglas le Jezushesko trupo.
Pala kodo tele las les, ando poxtan patyardas les, haj andekh plaj shindo murmunto shutas les, ande soste inke khonyik chi pashjilas.
Le angle lasharimatako dyes sas, haj pashardyolas o savato.
Le romnya, kon anda Galilea aviline lesa, pala leste geline, haj dikhline o murmunto, ke sar shutine tele lesko trupo.
Pala kodo khere geline, lashe sungangire palya haj makhlyimata kerdine, ba le savatones, sar so si vladime, ande pacha hodinisardine.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly