capitolul 16
Anda kodo phenav tumenge, tena xolyajven.
Avriphandavna tumen anda zhinagogi, haj avla vi kodo chaso, ke sa kodola, kon mudarela tumen, kodo gindila, ke le Devleske slugisardas kodalesa.
Anda kodo kerena kado, ke chi pinzhardine chi le Dades haj chi man.
Sa kado pale anda kodo phenav tumenge, ke kana avelatar kadalenge chaso, seron pe lende, ke me phendomles tumenge. Anglalutnes anda kodo chi phendom kadala, ke tumenca somas.
Akanak zhavtar kaj kodo kon bishaldas man, haj khonyik mashkar tumende chi pushel mandar: »Kaj zhas?«
Ba ke kadala phendo, brigasa pherdyilas tumaro ilo.
Ba me o chachipe phenav tumenge: Maj mishtoj tumenge te zhotar. Ke tena zhotar, o Ushori chi avelatar tumende, ba te zhotar, bishalo les tumende.
Voj kana avelatar, chacharel la luma pa bezex, pa chachipe, pa krisaripe:
apol pa bezex, ke chi patyan ande mande:
Pa chachipe, ke kaj o Dad zhav, haj majbut chi dikhena man:
haj pa krisaripe, ke kadala lumako kraj krisardo si.
Inke but sakofalo trubujas te phenav tumenge, ba inke akanak chi zhanenas te hatyarenles.
Kana pale avelatar le chachipesko Duho, voj ingrela tumen po intrego chachipe, ke na pestar vorbila, ke kodo phenela so ashunel, haj le avlune trabi viacarela tumenge.
Voj maj luvudyisarela man, ke anda muro lela, haj avri phenel kodo tumenge.
Sa kodo so le Dadeskoj, muroj: anda kodo phendom, ke anda muro lel, haj avriphenel kodo tumenge.
Inke jekh cerra vrama haj chi dikhen aba man, pala kodo pale jekh cerra vrama, haj dikhena man.”
Atunchi mashkar le sityarde unyizhene kade dine duma: „Soj kodo, so phenel amenge: »Jekh cerra vrama haj chi dikhen man, pala kodo pale cerra vrama, haj dikhena man«? haj: »Kaj o Dad zhav«?”
Pala kodo kado phendine inke: „Soj kodo so phenel: »Jekh cerra vrama«? Chi hatyaras so phenel!”
O Jezush sama las, ke kamen te pushen les, anda kado kade das duma: „Pa kodo vorbin tume mashkar jekhavreste, ke kodo phendom: »Jekh cerra vrama haj chi dikhen man, pala kodo pale jekh cerra vrama, haj dikhena man«?
Amen, amen phenav tumenge, ke rovena haj cipina, e luma pale losshala. Tume maj brigasle avna, ba tumari briga pe lossh boldelape.
Vi e romnyi, kana shavores anel pe luma, brigilpe, ke avilastar lako chaso: ba kana pe luma andas peske shavores, aba chi seroj pe briga anda lossh, ke manush arakhadyilas pe luma.
Vi akanak brigin tume, ba pale dikho maj tumen, tumaro ilo vojilape, haj tumari lossh chi lel tumendar khonyik.
Haj kodo dyes aba khanchi chi pushena mandar.
Amen, amen phenav tumenge: So feri mangen kathar o Dad ande muro anav, del kodo tumenge.
Zhikaj kado, khanchi chi mangline ande muro anav. Mangen, haj lenales, ke tumari lossh intrego te avel.
Kadal ande paraboli vorbisardom tumenge. Ba avelatar kodo chaso, kana aba na ande paraboli vorbisaro tumenge, ba uzhes vorbisarav pa Dad.
Pe kodo dyes mangena maj ande muro anav, haj me chi pheno tumenge, ke me mango le Dades anda tumende,
ke pestar o Dad kamel tumen, ke tume kamenas man, haj patyanas, ke kathar o Del avilom.
Avilomtar kathar o Dad haj kathe avilom ande luma: akanak pale mukav la luma, haj zhavtar kaj o Dad.”
Leske sityarde pe kado kodo phendine: „Aketa, akanak uzhes vorbis, haj na parabola phenes.
Akanak zhanas, ke sakofalo zhanes, haj chi trubul tuke, ke varikon te pushel tut. Anda kado patyas, ke kathar o Del avilan.”
O Jezush kodo phendas lenge: „Akanak patyan?
Aketa, avelatar kodo chaso, haj aba vi kathe si, kana zhahaltar, sakon ande pesko kher, man pale korkoro mukena. Ba me chi som korkoro, ke o Dad manca si.
Kadal anda kodo phendom tumenge, ke pachipe te avel ande mande tumen. Ande luma pharimata avla tumen, ba patyan, me tele viktornosardom la luma.”
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly