capitolul 18
Pala soste o Jezush kadal phendas, avrigelas peske sityardenca perdal pa Kedronesko ab, kaj sas jekh bar: kothe gelas andre voj haj leske sityarde.
Pinzharlas kodo than vi o Judash, kon purrisardas les, ke o Jezush butivar phirelas kothe peske sityardenca kethanes.
O Judash apol, kana pasha peste las le ketanen, haj kathar le angrashaja haj farizana slugan, kothe gelas phabardenca, haj jagasle kashtenca haj mudvarenca.
O Jezush pale, kon zhanelas sakofalo, so zhukarelas pe leste, angla lende gelas, haj pushlas lendar: „Kas roden?”
Kodo phendine leske: „Le Nazaretickone Jezushes.” Voj kodo phendas lenge: „Me som.” Kothe tordyolas lenca vi o Judash, kon purrisardas les.
Kana kodo phendas lenge: „Me som”, darajline haj pe phuv peline.
Pe kado pale pushlas len: „Kas roden?” Kodal pale kodo phendine: „Le Nazaretickone Jezushes.”
O Jezush inke jokhar phendas: „Phendom tumenge: Me som! Kana apol man roden, muken kadalen te zhantar!”
Andre trubusardas te pherdyol le alaveske, so phendas: „Kas mange dan, mashkar kodal khanyikas chi xasardom.”
Ke le Shimon Peteres sasles jekh xanro, avricirdas kodo, haj pe le angrashajeski sluga maladas, haj tele shindas lesko chacho kan. Le slugasko anav Malkus sas.
O Jezush pe kado kodo phendas le Petereske: „Shuv palpale pe lesko than tyo xanro! Te na pav avri o taxtaj, so o Dad mange das?”
Atunchi le ketani haj le biboldenge slugi xutyildine le Jezushes, haj phangline les.
Majanglal kaj o Annash ingerdine les, ke voj sas lesko sokro le Kaifasheske, kon angrashaj sas ande kodo bersh.
O Kaifash sas kodo, kon kodi vorba phendas le biboldenge: „Majmishtoj, kana jekh manush merel anda popularo”.
O Shimon Peter haj jekh kaver sityardo pala Jezush zhalas. Kado sityardo pinzhardo sas le angrashajeske, haj andre gelas le Jezushesa ande angrashajeski avlina,
o Peter pale avral tordyolas kaj o vudar. Avrigelas apol kodo kaver sityardo, kon pinzhardo sas le angrashajeske, haj andre ingerdas le Peteres.
Atunchi e sluga, kon kaj o vudar tordyolas kodo phendas le Petereske: „Chi san vi tu kadale manushesko sityardo?” Voj kado phendas: „Chi som!”
Kothe tordyonas le slugi haj le ketani, kon jag kerdine, ke shil sas, haj tatyonas. Vi o Peter kothe tordyolas lenca, haj tatyolas.
O angrashaj tala kadi vrama le Jezushes pa leske sityrde haj pa lesko sityaripe pushelas.
O Jezush kodo phendas leske: Me uzhes vorbisardom la lumake, sagda ande zhinagoga sityardom haj ande khangeri, kaj le bibolde savorazhene kethane aven, haj ande tajna khanchi chi phendom.
Sostar pushes man? Push kodalen, kon ashundine, ke so phendom lenge. Aketa, von zhanen, ke so phendom lenge.”
Kana kado phenelas, jekh ketana kon kothe tordyolas pa muj shindas les, haj kade das duma: „Kade des duma kaj o angrashaj?”
O Jezush kodo phendas leske: „Kana nasul phendom, sikav andre, ke nasul phendom, ba kana mishto, atunchi sostar malaves man?”
Atunchi o Annash bishaldas les kade phanglo, kaj o Kaifash angrashaj.
O Shimon Peter pale kothe tordyolas haj tatyolas. Unyizhene kodo phenenas leske: „Dore, vi tu mashkar leske sityarde san?” Ba voj tele asvikardas les: „Chi som!”
Le angrashajeski jekh sluga, nyamo kodaleske, kaske o Peter tele shindas lesko kan, kade das duma: „Na tut dikhlom kothe lesa ande bar?”
O Peter pale tele asvikardas les, haj atunchi oprecipisardas o bashno.
Le Jezushes kathar o Kaifash po prefektoripe ingerdine. Detehara sas. Von chi geline andre po prefektoripe, ke tena kerdyon biuzharde, haj te shaj xan la Patradyaki bakrori.
Anda kado o Pilatush gelas avri lende, haj pushlas len: „Soski dosh phenen pe kado manush?”
Kodo phendine leske: „Tena avlas nasul manush, chi damas les ande tye vast.”
Pe kado o Pilatush kodo phendas lenge: „Len les tume perdal, haj krisaren les sar tumari kris phenel.” Le bibolde kodo phendine leske: „Amenge khanyikas naj slobodo te mudaras.”
Kado anda kodo pecisajlas, ke andre te pherdyol le Jezusheski vorba, so phendas, haj anglal phendines, ke soske meripesa merela.
Pale andre gelas apol o Pilatush po prefektoripe, akharadas le Jezushes, haj pushlas les: „Tu san le biboldengo kraj?”
O Jezush kodo phendas: „Tutar phenes kado, bake kavera phendine tuke kado pa mande?”
O Pilatush kado phendas leske palpale: „Haj biboldo som me? Tyire nyamura haj le angrashaja dine tut ande mure vast. So kerdan?”
O Jezush kodo phendas: „Muro them na anda kadi luma si. Apol muro them anda kadi luma te avlas, mure slugi lenaspe te marenpe, ke ande biboldenge vast tena resav. Ba muro them na katharutnoj.”
O Pilatush pe kado pushlas les: „Apol kraj san tu?” O Jezush kodo phendas: „Tu phenes, ke kraj som. Pe kodo arakhadyilom, haj anda kodo avilom ande luma, ke chacharimata te kerav pa chachipe. Sa kodo, kon anda chachipe si, ashunel pe muri vorba.”
O Pilatush pe kado kade das duma: „Soj o chachipe?” Haj pala kadal vorbi pale avrigelas kaj le bibolde, haj kodo phendas lenge: Me khanchi dosh chi rakhav ande leste.
Jako si tumende, ke kana Patradyi si, slobodo te mukav tumenge varikas. Kamen apol, slobodo te mukav tumenge le biboldenge krajes?”
Pe kado pale kade cipinas: „Na kadales, barem le Barabashes!” O Barabash pale chor sas.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly