capitolul 8
O Jezush pale avrigelas pe uloj kashtengo plaj.
Detehara pale gelastar ande khangeri, kaj sa le but manusha krujal line les. Telebeshlas haj sityarelas len.
Le iskiritora haj le farizana kothe ingerdine leste jekha romnya, kas sama line, ke ansuripe phaglas. Mashkarutnes tordyardinela,
haj kodo phendine le Jezusheske: Maistro! Kadala romnya sama line, ke ansuripe phaglas.
O Mozesh ande kris kodo vladisardas amenge, ke kadalen trubuj barrenca te shudas. Tu apol so phenes?”
Kado anda kodo phendine, ke avri te zumaven les, haj te shaj dosharen les. Ba o Jezush tele bandyilas haj peske najesa iskirisardas pe phuv.
Kana kodal majdur pushenas les, opretordyilas haj kodo phendas lenge: „Kon mashkar tumende bi bezexako si, kodo te shudel majanglal pe late barr.”
Pala kodo pale tele bandyilas haj iskirilas pe phuv.
Kadal pale kana kado ashundine, pala jekhavreste sa gelinetar, le phurenca kethane, haj voj korkoro ashilas po mashkaral tordyarda romnyasa.
O Jezush opretordyilas haj kodo phendas lake: „Romnye, kaj sile von? Ta khonyik chi krisardas tut?”
Kodi pe kado kade das duma: „Khonyik, Raja!” O Jezush atunchi kado phendas lake: „Chi me chi krisarav tut. Zhatar, haj majbut aba na bezexar!”
O Jezush pale duma das haj kodo phendas lenge: „Me som la lumako fimlalipe. Kon avel palamande, chi phirel ando tunyarikipe, ba lesko avla la lumako fimlalipe.”
Pe kado le farizana kodo phendine leske: „Tu pa tute shos chacharipe, kade tyo chacharipe naj chacho.”
O Jezush kodo phendas lenge: „Kana me pa mande te shav chacharipe, chachoj muro chacharipe, ke zhanav, ke kathar avilom, haj kaj zhav. Ba tume chi zhanen, ke kathar avilom haj kaj zhav.
Vi tume pala trupo krisaren, ba me chi krisarav khanyikas.
Kana pale krisarav, chachoj muro krisaripe, ke chi som korkoro, ba me, haj kodo, kon bishaldas man, o Dad.
Apol vi ande tumari kris iskirime si, ke duje manushengo chacharipe chacho si.
Me som kodo, kon chacharipe shol pa peste, haj chacharipe shol pa mande vi kodo, kon man bishaldas, o Dad.”
Pe kado pushline: „Kaj si tyiro Dad?” O Jezush kodo phendas: „Chi man chi pinzharen haj chi mure Dades. Man te pinzharenas, dore vi mure Dades pinzharenas.”
Kadal vorbi phendas kaj e avucija inkrenas, kana ande khangeri sityarelas. Khonyik chi xutyildas les, ke inke chi avilastar lesko chaso.
Pala kodo pale duma das lende: „Zhavtar haj rodena man, ba meren ande tumare bezexa. Kaj me zhav, kothe tume nashtig aven.”
Le bibolde pe kado kodo phendine: „Dore chi mudarel pes haj anda kodo phenel kado: »Kaj me zhav, kothe tume nashtig aven«?”
Voj kodo phendas lenge: „Tume kathe telalutne san, me pale opralutno. Tume anda kadi luma sanle, ba me chi som anda kadi luma.
Anda kado phendom tumenge, ke meren ande tumare bezexa. Ke tena patyan, ke me som, atunchi meren ande tumare bezexa.”
Pe kado kodo pushline: „Kon san tu?” O Jezush kodo phendas: „Kodo, so sagda phendom tumenge.
But trubulas inke pa tumende te phenav haj te krisarav, ba kon bishaldas man, chachipe phenel, haj me kodo phenav avri la lumake, so lestar ashundom.”
Kodal chi hatyardine, ke pa Dad vorbil lenge.
Anda kado o Jezush kade das duma: „Kana oprevazdena le Manusheske Shaves, atunchi avrizhanena, ke me som, haj khanchi chi kerav mandar, ba kade phenav kadala, sar o Dad sityardas man.
Haj kon bishaldas man, manca si, chi muklas man korkoro, ke sagda kodo kerav, so skunpoj leske.
Kana kadal phendas, but zhene patyanas ande leste.
Kodal biboldenge, kon payanas leske, kodo phendas: „Te ashona ande muro sityaripe, chachikanes mure sityarde san,
pinzharen o chachipe, haj o chachipe slobodisarel tumen.”
Kodal kodo phendine leske: „Le Abrahameske falura sam, haj chikana khanyikaske chi slugisardam. Sar shaj phenes apol tu, ke »slobudura avna«?”
O Jezush kade das duma: „Amen, amen, phenav tumenge: Sa kodo, kon bezex kerel, slugaj.
Ba e sluga chi ashol sagda ando kher, numa o Shavo ashol kothe sagda.
Kana apol o Shavo slobodisarel tumen, chachikanes slobodura avena.
Zhanav, ke le Abrahameske falura san, ba kamen man te mudaren, ke muro sityaripe chi resel ande tumende.
Me kodo phenav, so kaj o Dad dikhlom, haj tume kodo keren so kathar tumare dada ashundine.”
Kodo phendine palpale leske: „Amaro dad o Abraham si!” O Jezush kodo phendas lenge: „Le Abrahameske shave te avenas, le Abrahameske trabi kerenas.
Ba akanak kamen te mudaren man, kodale manushes, kon tumenge kodo chachipe phendom, so kathar o Del ashundom: kado o Abraham chi kerdas.
Tume tumare dadenge trabi keren.” Pe kado kodo phendine leske: „Ame na anda marhipe arakhadyilam. Jekh Dad si amen, o Del!”
O Jezush kade das lende duma: „O Del te avlas tumaro Dad, kamenas man, ke me kathar o Del som haj lestar avilom. Ke na mandar avilom, ba voj bishaldas man.
Sostar chi hatyaren muri vorba? Sostar chi zhanen te ashunen muro alav.
Tume kathar le beng-dadestar san, haj tumare dadesko dorope kamen te keren. Voj mudari sas zhikathar o anglalutnipe, haj ando chachipe chi tordyilas, ke naj ande leste chachipe. Kana xoxavjimata phenel, pestar vorbil, ke xoxamnoj haj le xoxamnimasko dad si.
Ba me o chachipe phenav, anda kado chi patyan mange.
Kon shaj dosharel man mashkar tumende bezexesa? Kana chachipe phenav tumenge, sostar chi patyan mange?
Kon kathar o Del si, kodo le Devleske alava ashunel. Tume anda kodo chi ashunen les, ke chi sanle kathar o Del.”
Le bibolde kodo phendine palpale: „Dore na mishto phenas, ke samaritano san haj beng si tut?”
O Jezush kodo phendas: „Naj man beng, numa patyivisarav mure Dades, haj tume marhimata phenen pe mande.
Ba me chi rodav muro luvudyipe: si kon rodel kodo, haj krisipe phenel.
Amen, amen, phenav tumenge: Kon inkrel muro sityaripe, kodo meripe chi dikhel chikana.”
Kodo phendine pe kado le bibolde: „Akanak pinzhardam avri, ke beng si tut. O Abraham mulas, haj vi le profeti, haj tu kodo phenes: »Kana varikon muro sityaripe inkrel, chi resel o meripe chikana.«
Majbaro san dore vi kathar amaro Abraham dad, kon mulas? Vi le profeti muline. Soske shos apol tut?”
O Jezush kodo phendas lenge: „Me te luvudyisarav man, atunchi muro luvudyipe khanchi si. Muro Dad si kodo, kon luvudyisarel man, pa kaste tume kodo phenen: »Amaro Del si«,
ba chi pinzharel les. Ba me pinzharav les. Kana kodo te phenos, ke chi pinzharav les, kasavo xoxamno avos atunchi sar tume. Ba me pinzharav les, haj lesko sityaripe inkrav.
O Abraham tumaro dad, losshalas, ke shaj dikhel muro dyes. Dikhlasles, haj losshalas.”
Le bibolde pe kado kodo phendine leske: „Inke chi panzhvardeshe bershengo chi san, haj dikhlan le Abrahamos?”
O Jezush kodo phendas lenge: „Amen, amen phenav tumenge: Zhiso majanglal o Abraham avilinosas, me som.”
Atunchi barr xutyildine, te shuden les barrenca. Ba o Jezush garadyilas, haj avri gelas anda khangeri.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly