capitolul 9
Kana majdur gelas, dikhlas jekhe manushes kon korres arakhadyilas.
Leske sityarde pushline les: „Maistro, kon bezexardas, voj bake lesko dad haj dej, ke korres arakhadyilas?”
O Jezush kodo phendas: „Chi voj haj chi lesko dad haj dej chi bezexardas, ba le Devleske trabi trubuj te sikadyon ande leste.
Amenge kodaleske trabi trubuj te keras, kon man bishaldas, zhikaj dyes si. Avlatar e ratyi kana khonyik nashtig butyarel.
Zhikaj ande luma som, fimlalimata som la lumake.”
Palasoste kadal phendas, pe phuv shungardas, chik kerdas anda shungar, e chik pe korreske jakha makhlas,
haj kodo phendas leske: „Zhatar, haj thov tut ande Siloesko paji!” Kado bishalipe si. Gelastar apol, haj thodaspe, haj saste jakhenca avilas palpale.
Anda kadal le vechina haj kon angla kodo dikhline les sar mangakerares, kodo pushline: „Na voj si kodo, kon kathe beshelas, haj mangakerlas?” Sas kon kodo phenenas: „Voj si.”
Inke kavera kade dine duma: „Na, numa cirdel pe leste.” Ba voj avriphendas: „Me som kodo.”
Pe kado pushline lestar: „Sar puterdyiline tye jakha?”
Kodo phendas: „Kodo manush, kas Jezusheske akharen, chik kerdas, makhlas mure jakha, haj kodo phendas mange: »Zhatar kaj le Siolesko paji, haj thov tut.« Gelomtar apol, haj thodem man, haj dikhav.”
Kodal pushline lestar: „Kaj si voj?” Voj kodo phendas: „Chi zhanav.”
Atunchi ingerdine kaj le farizana kodoles, kon majanglal korro sas.
Haj pe kodo dyes, kana o Jezush, e chik kerdes haj puterdas leske jakha, savato sas.
Pale pushline lestar vi le farizana, ke sar las palpale peske jakhengo dikhipe. Voj kodo phendas: „Chik shutas pe mure jakha, thodem man, haj dikhav.”
Kado phendine unyizhene mashkar le farizana: „Na kathar o Del si kado manush, kon le savatones chi inkrel andre!” Kavera kodo phendine: „Sar shaj kerel bezexaslo manush kasave chudicka somnura?” Haj shindyipe kerdyilas mashkar lende.
Pe kado pale pushiline kathar o korro: „Tu so gindis pa leste, ke apol opreputerdas tye jakha?” Voj pale kodo phendas: „Profetaj!”
Ba le bibolde chi patyajline pa leste, ke korro sas, haj palpale avilas lesko dikhipe, zhikaj angle chi akhardine, abakanak le saste jakhengireske dades haj deja.
Pushline len: „Tumaro shavo si kado, haj kodo phenen pa leste, ke korres arakhadyilas? Akanak apol, sar dikhel?”
Kodal kado phendine: „Kodo zhanas, ke kado amaro shavo si, haj ke korres arakhadyilas.
Haj akanak, ke sar dikhel, chi zhanas, haj ke kon puterdas leske jakha chi kodo chi zhanas. Pushen les, si aba kattyi vramako, maj voj vorbil pa peste.”
Kado anda kodo phendas le korresko dad haj dej, ke daranas kathar le bibolde, ke aba kethane vorbisardine le bibolde, ke kana varikon Kristoske phenel les, avritrubuj te phandaven les anda zhinagoga.
Anda kodo phendas o dad haj dej: „Si aba kattyi vramako, les pushen.”
Vi po dujto akhardine kade le manushes, kon korro sas, haj kodo phendine leske: „De luvudyipe le Devleske! Ame zhanas, ke kado manush bezexasloj.”
Voj kodo phendas: „Ke bezexaslo si, me chi zhanav. Jekh zhanav: ke korro somas, haj akanak pale dikhav.”
Pe kado pushline lestar: „So kerdas tusa? Sar puterdas opre tye jakha?”
Kodo kado phendas lenge: „Phendomles aba tumenge, ba chi ashundineles. Sostar kamen pale te ashunenles? Dore chi kamen vi tume leske sityarde te aven?”
Pe kado armaja dine les, haj kado phendine: „Tu san lesko sityardo, ame le Mozesheske sityarde sam.
Ame zhanas, ke kaj o Mozesh vorbilas o Del, pa kado pale chi zhanas, ke kathar si.”
O manush pe kado kodo phendas: „Haj, zhikado si e bari butyi, ke tume chi zhanen, ke katharutnoj, mange pale opreputerdas mure jakha.
Zhanas, ke o Del le bezexaslen chi ashunen, ba kon Del-daramnoj, haj kerel lesko kamipe, kodales ashunel.
Zhikathar e luma tordyol, chikana nashtig ashundine, ke varikon opreputerdas, jekhe kasave manusheske jakha, kon korres arakhadyilas.
Kana voj na kathar o Del te avlino, nashtig kerdino khanchi.”
Kodal kodo phendine leske: „Kathar sakofalostar ando bezex arakhadyilan, haj tu sityares amen?” Haj avrishudine les.
O Jezush ashundas, ke avrishudine les, haj kana maladyilas lesa, pushlas lestar: „Patyas ande Manushesko Shavo?”
Kodo kado phendas palpale: „Kon si kodo, Raja, te patyav ande leste?”
O Jezush kodo phendas leske: „Haj apol dikhes les: voj si kodo, kon tusa vorbil.”
Pe kado kodo kade das duma: „Patyav, Raja!” Haj tele burdosardas angla leste.
Atunchi o Jezush kodo phendas: „Po krisaripe avilom pe kadi luma, ke kon chi dikhen, te dikhen, haj kon dikhen, korreske te aven.”
Mashkar le farizana, kon lesa sasle, unyizhene ashundine kado, haj kodo phendine leske: „Dore, chi sam vi ame korre?”
O Jezush kado phendas lenge: „Korre te avnas, chi avlas tumen bezexa. Ba tume kodo phenen akanak: »Dikhas.« Anda kado ashol tumari bezex.”
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly