capitolul 21
Pala kadal o Jezush pale sikadyilas le sityardenge, kaj e Tiberiasheski mara. Kade sikadyilas:
Kethane sas o Shimon Peter, o Tamash, kas Ikereske akharenas, anda galileicko Kana o Natanael, le Zebedeusheske shave, haj inke kaver duj mashkar leske sityarde.
O Shimon Peter kodo phendas lenge: „Zhavtar te masharav.” Kodal kodo phendine leske palpale: „Zhas tusa vi ame.” Gelinetar apol, haj andre hulyiline ando bero, ba kodi ratyi khanchi chi xutyildine.
Kana aba zorisardyilas, o Jezush pe dolma tordyolas, ba le sityarde chi zhanenas, ke o Jezush si kodo.
O Jezush kodo phendas lenge: „Mure shave, naj tumen variso xamasko?” Kodo phendine: „Naj!”
Voj atunchi kodo phendas lenge: „Shuden avri o xudro pe beroski chachi rig, haj rakhena!” Avrishudineles, ba avri te cirdenles aba chi zhanenas kathar le zurales but mashe.
Atunchi kodo sityardo, kas o Jezush kamelas, kade das duma kaj o Peter: „O Raj si kodo!” Kana o Shimon Peter ashundas, ke o Raj si kodo, pe peste las pesko pluvialo, ke dopash nago sas, haj ande mara xuttyilas.
Le majbut sityarde pale le berosa aviline avri, ke nasle dur kathar e dolma, numa karing le dujshela kuja dur, haj cirdenas pala pende le mashenca pherdyiline xudros.
Kana avri hulyiline pe dolma, phabardo zharo dikhline, pe leste mashes haj pasha leste manres.
O Jezush kodo phendas lenge: „Anen anda mashe, saven akanak xutyildine!”
Pe kado o Shimon Peter palpale gelas, haj pe dolma cirdas o xudro, savo pherdo sas shel thaj panzhvardesh thaj trine bare mashenca. Haj chaches ke kattyi sas, ba chi shindyolas o xudro.
O Jezush kodo phendas lenge: „Aven, xan!” Mashkar le sityarde khonyik chi tromajlas te pushel les: „Kon san tu?” Ke zhanenas, ke o Raj si kodo.
O Jezush kothe gelas, xutyildas o manro, kothe dasles lenge, zhikade vi le mashes.
O Jezush aba po trito sikadyilas le sityardenge zhikathar kodo, ke opretrajisardyilas anda meripe.
Pala soste xaline, o Jezush pushlas le Shimon Peteres: „Shimon, le Janoshesko shavo, dore maj feder kames man, sar kadal?” Voj kodo phendas: „Ova, Raja, tu zhanes, ke kamav tut!” Pe kado kodo phendas leske: „Le sama pe mure bakre!”
Pala kodo vi po dujto pushlas: „Shimon, le Janoshesko shavo, kames tu man?” Kodo phendas palpale: „Ova, Raja, tu zhanes, ke kamav tut!” Pe kado kodo phendas leske: „Le sama pe mure bakre!”
Pala kodo pale pushlas les: „Shimon, le Janoshesko shavo, kames tu man?”, haj kodo phendas: „Raja, tu sakofalo zhanes, tu zhanes, ke kamav tut!” Atunchi kade das duma: „Le sama pe mure bakre!
Amen, amen phenav tuke: kana majterno sanas, oprebrichinaresas tut, haj kothe zhasas, kaj kamesas. Kana apol phuro kerdyos, avrilunzhares tye vast: kaver brichinarel tut opre, haj kothe ingrel tut, kaj chi kames.”
Kado pale anda kodo phendas, ke te somnosarel, ke soske meripesa luvudyisarela les o Del. Pala soste kado phendas, kade das duma: „Av pala mande!”
Sar o Peter palpale boldaspe, dikhlas, ke avel pala leste kodo sityardo, kon kaj o xamo, pashe bandyilas kaj o Jezush, haj pushlas les: „Raja, kon si kon tut purril?”
Kana apol o Peter dikhlas les, pushlas kathar o Jezush: „Raja haj voj?”
O Jezush kodo phendas leske: „Kodo te kamav te ashol, zhikaj avavtar, so grizhostu lesa? Tu av pala mande!”
Anda kado mashkar phral kodo phenipe phirelas, ke kodo sityardo chi merela. Ba apol o Jezush na kodo phendas leske: „Chi merel”, ba kodo: „Kodo te kamav, te ashol, zhikaj avavtar, so grizhostu lesa?”
Kado sityardo, kon chacharipe kerel sa pa kadal, haj kon kadal iskirisardas. Zhanas, ke chachoj lesko chacharipe.
Si inke vi but kaver trabi, so o Jezush kerdas, haj kodal jekh pala jekh tele te iskirinas, kade gindisarav, chi e intrego luma chi zhanelas andre te svagarel le hertiji, saven trubujas te iskirin.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly