capitolul 10
Pala kado peste akhardas peske deshuduje sityarden. Zor daslen po biuzho duho, avri te nashaven kodalen, haj te sastyaren sako nasvalipe haj sako bida.
Le deshuduje aposhtolengo anav pale kadal si: o angluno Shimon, kas Petereske anavaren, haj o Andrash, lesko phral,
Jakab, le Zebedeushesko shavo, haj lesko phral, o Janosh, o Filip haj o Bertalan, o Tamash haj o financo Mate, o Jakab, le Alfeusesko shavo, o Tade,
o kanaanicko Shimon, haj o ishkarioticko Judash, kon vi purrisardas les.
Kadale deshudujen bishaldas o Jezush, haj vladisardas lenge: „Kaj le murtikana inkerde droma na nakhen tele, haj ande samaritaniushengo foro na zhan andre!
Zhantar barem kaj Izrael kheresko xasajle bakre!
Zhan haj viacaren: »Pashardyilas le rajosko them!«
Sastyaren nasvalen, haj trajaren opre le mulen, uzharen le lepralen, haj nashaven avri bengen! Ive lineles, ive denles!
Tena avel tumen chi somnakaj, chi rup, haj chi xarkomasle love ande tumaro brichinari,
chi dromeski trasta, chi duj gada, haj sandala, chi rolyi! Ke perelpe le butyareske lesko potyinipe.
Kana andekh foro bake gav andre zhan, zhanen avri, ke kon si ande leste patyivalo, haj ashon leste, zhikaj majdur chi zhan.
Kana andre ushtyaven ando kher, denles dyes!
Te si patyivalo o kher, te hural pe leste tumari pacha; kana pale naj patyivalo, tumari pacha te hural palpale pe tumende.
Haj kana varikon chi astarel tumen, haj chi ashunel tumari vorba; zhantar avri anda kodo kher haj anda kodo foro, haj maren tele vi o praho pa tumaro punro.
Amen, phenav tumenge: maj ushoro zheja avla la Sodomake haj Gomorake phuva pe krisarimako dyes, sar kodale foroske.
Aketa, kade bishalav tumen, sar bakren mashkar le ruv. Aven apol godyavera, sar le sap, haj jekhtune, sar le gulunbura.
Ba ferin tumen kathar le manusha! Ke perdal den tumen le svatoske, haj ande penge zhinagogi marena tumen.
Kaj le prefektushura haj kaj penge kraja ingrena tumen anda mande, ke chacharipe te keren angla lende haj angla murtikana.
Kana pale perdal dena tumen, na daran anglunes, ke sar bake so te phenen. Ke davadyola tumenge ande kodo chaso, ke so te phenen.
Ke apol, na tume sanle kon vorbin, ba tumare Dadesko Duho si kodo, kon vorbil perdal pa tumende.
Atunchi po meripe dela o phral le phrales haj o dad peske shaves. Le shavora pe penge dada haj deja dena, haj po meripe dena len.
Ruci avna angla sakoneste anda muro anav, ba kon avri inkrel intregones, kodo muntusardyol.
Kana andekh foro nashavna tumen, nashentar ando kaver. Ke Amen phenav tumenge: chi phirena sagutnes perdal le Izraeleske forura, zhikaj chi avelatar le Manushesko Shavo.
Naj maj baro o sityardo kathar pesko Maistrovo, chi e sluga kathar pesko raj.
Dostaj le sityardeske, kana kasavo avla, sar lesko Maistrovo, haj le slugaske, sar lesko raj. Kana le khereske rajes Belzebuleske anavarenas, sodivar majfeder leske khereske manushen?
Na daran apol lendar! Ke khanchi naj garado, so avri na zhanardyolas, haj naj garadi butyi, so avri na zhanardyolas.
So ando tunyariko phenav tumenge, phenenla vi dyese, haj so ando kan phendines ashunen, pa kherengo opralutnipe viacaren.
Na daran kathar kodola, kon mudaren o trupo, ba o duho chi zhanen te mudaren. Daran barem kathar kodo, kon vi o duho haj vi o trupo zhanel te mudarel ande dyehenna.
Duje chiriklyan dore pekh krecari biknen? Haj chi jekh chi perel pe phuv kade, ke tumaro Dad tena zhanelas pa lende.
Ba tumenge inke vi tumare bal ginade si pe tumaro shero.
Na daran apol, ke maj but sanle tume kathar le chiriklya!
Sa kodal, kon chacharen man angla manusha, vi me chacharav len angla muro Dad, kon ando rajo si.
Ba kodo kon asvikarel man angla manusha, vi me asvikarav les angla muro Dad, kon ando rajo si.
Na gindisaren, ke pacha avilom te anav pe phuv. Na anda kodo avilom, pacha te anav, bethar xanro.
Anda kodo avilom, ke mostar te tordyarav le manushes peske dadesa,
la sha la dejasa,
haj la bora la sokrasa;
peske khereske nyamura avna le manusheske dushmana
Kon majfeder kamel peska da bake dades, najles grizha mande. Kon majfeder kamel peske shaves bake sheja, sar man, najles grizha mande.
Kon chi lel opre pesko trushul, haj ch«avel pala mande, najles grizha mande.
Kon arakhlas pesko trajo, xasarel kodo, haj kon xasardas pesko trajo, anda mande, rakhel voj kodo.
Kon andre svagarel tumen, man svagarel andre, haj kon man svagarel andre, kodo kodales svagarel andre, kon man bishaldas.
Kon andre svagarel je-khe profetas, ke profetaj, kodo le profetasko potyinipe lela. Kon andre svagarel jekhe chaches, ke chachoj, kodo le chachesko potyinipe lela.
Haj kon del, vi numa jekh taxtaj shudro paji jekheske mashkar kadal majcine, ke muro sityardo si, Amen, phenav tumenge: chi xasarel pesko potyinipe.”
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly