capitolul 5
Kana dikhlas le manushengo butipe opre gelas po plaj. Tele beshlas, leske sityarde kothe aviline leste,
voj pale pe vorbimata puterdas pesko muj haj kade sityarelas len:
„Anandej ando duho chorre, ke lengoj le rajonge thema.
Anandej kon roven, ke von ushorimata lena.
Anandej le blindura, ke pe lende ashola e phuv.
Anandej kon bokhajven haj trushajven o chachipe, ke von andre pherdyimata resena.
Anandej le lashe, ke von lashimata resena.
Anandej le uzhe ilengire, ke von dikhena le Devles.
Anandej le pachake manusha, ke len le Devleske shavenge anavarena.
Anandej kas anda chachipe nashavena, ke lengoj le rajongo them.
Anande san kana marhin tumen haj nashaven tumen, haj xoxamnes sakofalo nasulimata phenen pe tumende anda mande.
Losshan haj vojin tumen, ke tumaro potyinipe baroj ando rajo; ke kade nashavenas vi le profetan, kon angla tumende sasle.
Tume san la phuvako lon. Ba o lon bi svadaslo kerdyola, sosa londyarena les? Pe khancheste chi avla aba lasho majdur, kade avri shuden haj punresa ushtyavena pe leste le manusha.
Tume sanle la lumako fimlalipe. Nashtig garaven o foro, so po plaj vazdine.
Chi phabardi na anda kodo phabaren, ke pala kodo tala balalyi te shonla, ba pe phabardako inkritoro, te fimlal sakoneske, kon ando kher si.
Kade te fimlal tumaro fimlalipe agla manusha, te dikhen penge lashe kerde trabi, haj te luvudyin tumare Dades, kon ando rajo si.
Na gindisaren, ke anda kodo avilom, te nacharav le krisa bake le profetan; na anda kodo avilom te nacharav len, ba anda kodo andre te pherdyarav len.
Ke Amen, phenav tumenge: zhikaj chi nacholatar o cheri thaj e phuv, chi jekh i teleiskiripe haj chi jekh ramope chi xasajvelatar anda kris, zhikaj sakofalo andre chi pherdyola.
Kon apol vi jekhes te mukela anda vi majcine vladimata haj kade sityarla le manushen, kodales le majcineske anavarena ande rajosko them; kon pale kerela les thaj kade sityarela, kodales bareske anavarena ande rajosko them.
Ke phenav tumenge: kana tumaro chachipe chi avla maj baro sar le iskiritorengire thaj farizanengire, chi sar chi zhana andre ande rajosko them.
Ashundine, ke kado phendine le dulmutanenge: »Na mudar; kon pale mudarel, phirel leske o krisaripe«
Ba me kodo phenav tumenge, ke sakon kon xolyajvel pe pesko phral, phirel leske o krisaripe. Varikon kodo te phenela peske phraleske: »Dile«, phirel leske le anglune svatosko krisaripe; kon pale kado phenel: »Chalade«, phirel leske la dyehennaki jag.
Kana apol opre shos tyi dimata po oltaro, haj kothe ande tyi godyi serojpe, ke tye phrales variso dukh si pe tute,
mukh kothe tyi dimata angla oltaro, haj majanglal zha thaj pachardyu avri tye phralesa, haj numa atunchi zha haj shu po oltaro tyi dimata.
Le po lasho tye dushmanos sigo, zhikaj lesa san po drom, dore tena del tut perdal tyo dushmano le krisareske, o krisari pale la krisake slugaske, kodo pale ande robija te shudel tut.
Amen phenav tuke, chi sar na avesa avri kothar, zhikaj chi potyinesa les avri zhikaj maj palune krecara.
Ashundine, ke kado phendine le dulmutane: »Na phag ansuripe!«
Me pale kodo phenav tumenge, ke sa kodo, kon pe romnyi dikhel anda kodo, ke dorosarel la, aba ansuripe phagel kodalesa ande pesko ilo.
Kana pale tyi chachi jakh marhil tut, shinla avri haj shudeles tutar; ke maj mishtoj tuke jekh rig te xasajvel anda tyo trupo, sar tye intregone trupos pe dyehenna te shuden.
Haj kana tyo chacho vast marhil tut, shinles tele haj shudeles tutar; ke maj mishtoj tuke jekh rig te xasajvel anda tyo trupo, sar tyo intrego trupo pe dyehenna te resel.
Vi kodo phendine: »Kon bishalel peska romnya, te del la shindyimasko lil«.
Me pale kodo phenav tumenge, ke sa kodal kon bishalen penga romnya – o marhipe chi inkerdyol kethe -, ansurimata phagavel lasa opre, haj kon bishalda zhulya lel romnyake, ansurimata phagel.
Vi kodo ashundine, ke kodo phendine le dulmutanenge: »Na colaxar xoxamnes, ba de le Devleske, so colaxasa avri phendan!«.
Me pale kodo phenav tumenge, chi sar na colaxaren; chi po cheri, ke kodo le Devlesko krajipe si,
chi pe phuv, ke kodo pale leske punresko iskamin si, chi po Jeruzhalemo, ke kodo le bare krajesko foroj.
Chi pe tyo shero na colaxar, ke chi tyo jekh bal chi zhanes te parnyares bake te kaljares.
T«avel tumari vorba: ova, ova, na, na; so kathar kadal majbut si, kathar o nasul si.
Ashundine, ke kodo phendine: »De jakh anda jakh haj de dand anda dand«.
Ba me kodo phenav tumenge: na bolden tumen karing o nasul, keren kado, kon malavel tut pe tyi mosuraki chachi rig, bolde leske kothe vi e kaver rig.
Haj kon kamel te lel tutar tyo gad, de leske perdal vi tyo zubuno;
haj kon kamel te ingrel tut zorasa pekh mija ushtyavjimata dur, zhatar lesa vi pe dujende.
Kon mangel tutar, kodales de, haj kathar kodo kon unzhiles kamel te mangel tutar, na bolde tut.
Ashundine, ke kodo phendine: »Kam tye dopashone vortakos haj rucisar tye dushmanos«
Me pale kodo phenav tumenge: Kamen tumare dushmanon, haj rudyin anda tumare nashavara,
ke shave te aven tumare rajune Dadeske, ke voj opre ushtyavel pesko dyes pe nasula haj lashe, haj brishind del chacheske haj nasuleske.
Ke kana numa kodalen kamen, kon vi tumen kamen, so avla tumaro potyinipe? Apol le Financura na zhikado keren?
Haj kana feri tumare phralen den dyes, so baro keren? Apol le murtikana na zhikado keren?
Tume apol aven federa, sar tumaro rajuno Dad feder si.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly