capitolul 19
Pecisajlas, ke o Jezush kana andre agorutnisardas kadal vorbi, gelastar anda Galilea, haj ande Judeaki granica gelas perdal pa Jordano.
But manusha zhanas pala leste, haj kothe sastyardas len.
Atunchi kothe geline leste le farizana, avri te zumaven les, pushline lestar: „Slobodo si te bishalel le manusheske pestar peska romnya anda zhisoski butyi?”
Voj pe kado kodo phendas: „Chi ginade, ke kon zhikathar o anglalutnipe kerdas, »mursheske haj zhulyake kerdas len?« haj kade das duma:
«Anda kado o manush mukel peske dades haj da, kaj peski romnyi cirdel, haj le duj jekhe truposke kerdyol«.
Kade apol aba na duj zhene si, ba jekh trupo. Kade so o Del kethane phanglas, kodales manush tena putrel opre.”
Pe kado kodo phendine leske: „Sostar vladisardas atunchi o Mozes, ke shindyimasko lil trubul te den haj kade trubuj te bishalen la?”
Kodo phendas lenge: „O Mozesh anda tumaro capeno ilo muklas tumenge, ke te bishalen tumara romnyan. Ba kado anglalutnes na kade sas.
Phenav apol tumenge: kon bishalel peska romnya – dore feri kana na anda marhipe -, haj kavera lela, ansurimata phagel.”
Leske sityarde pe kado kodo phendine leske: „Kana kade tordyol e butyi le manusheska romnyasa, maj mishto si kana china chi len romnya.”
Voj kodo phendas lenge palpale: „Na sakon hatyarel kadi traba, numa kodal, kaske davadyilas.
Ke si vi eunukha, kon anda penga dejaki utera kade arakhadyiline: pala kodo si eunukha, kas le manusha kerdine kasavenge, haj si vi kasave eunukha, kon pen bi murshardine anda rajesko them. Kon zhanel te hatyarelles, te hatyarelles.”
Atunchi cine shavoren ingerdine kothe leste, te shol pe lende pesko vast haj rudyimata te phenel, ba le sityarde kushline len.
Ba o Jezush kodo phendas: „Muken mande te aven le cine shavoren, haj na tordyaren len, ke kasavengej le rajosko them.”
Pe lende shutas pesko vast, haj majdur gelas kothar.
Atunchi aketa, varikon kothe gelas leste haj kodo phendas: „Maistro! So lasho te kerav, te resav o sagutno trajo?”
Voj kodo phendas leske: „Sostar pushes man pa lasho? Feri jekh varikon si o lasho. Kana pale andre kames te zhas po trajo, inker andre le vladimata.”
Kodo pushlas les: „Saven?” O Jezush kado phendas palpale: „Na mudar, na phag ansuripe, na colaxar xoxamnes,
patyivin tye dades haj tya da, haj kam tye dopashone vortakos, sar tut”.
O terno pe kado kodo phendas leske: „Sa kadala andre inkerdom, so faltil inke mange?”
Pe kado o Jezush kade das leste duma: „Kana feder kames te aves, bikin, kodo so si tut, dele kothe le chorrenge haj avucija avla tut ando rajo. Pala kodo av pala mande.”
Kadal vorbi ashundes o terno brigasles gelastar, ke baro barvalipe sas les.
Atunchi o Jezush kade das duma kaj peske sityarde: „Amen, phenav tumenge: o barvalo manush phares zhanel andre te zhal ande rajosko them.
Haj pale phenav tumenge: Maj ushoroj le dromedareske perdal te zhal pa suvako kan, sar le barvaleske andre te zhal ande Devlesko them.”
Kadal ashundes le sityarde zurales chudinaspe haj pushline les: „Atunchi apol kon shaj muntosardyol?”
O Jezush pe lende dikhlas haj kade das duma: „Le manushenge bi shajipe si kado, ba le Devleske sakofalo shajipe si”.
Atunchi duma das o Peter haj kado phendas leske: „Aketa, ame mukhlam sakofalo, haj avilam pala tute. So avla apol amenca?”
O Jezush kodo phendas leske: „Amen, phenav tumenge: tume, kon aviline palamande, kana avla o nyevo arakhadyipe, kana le Manushesko Shavo tele beshela pe pesko luvudyimasko iskamin, vi tume pe deshuduj iskamina beshena, haj krisarena le Izraeleske deshuduje kunpanian.
Haj sakon, kon mukhlas pesko kher, phralen bake phenyan, peske dades bake deja, peske shavoren bake peske phuva anda muro anav, shelvar kattyi lela haj sagutno trajo arakhela.
But zhene avna anda anglune palune, haj anda palune anglune.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly