capitolul 13
Kodo dyes o Jezush avri gelas anda kher haj tele beshlas pasha mara.
But manusha cirdepe krujal leste. Anda kado andre hulyilas andekh bero, tele beshlas, sa e butimata pale pe dolma tordyolas.
But sakofalo phendas lenge ande paraboli: „Aketa, avri gelas o sumburo beshavari, te beshavel.
Sar beshavlas o sumburo, unyi sumbura pe dromeski rig peline. Aviline le chiriklya haj opre kidinelen.
Kaver sumbura pe barrutne thana peline, kaj nasle but phuv. Sigo avri puterdyiline, ke nasle zurales tele ande phuv.
Ba kana o kham opreushtyilas, phabiline, haj ke naslen rikita, avrishutyiline.
Kaver unyi sumbura mashkar le kanre pelas. Le kanre opre bariline haj tasade len.
Palunes kavera sumbura ande lashi phuv peline. Kadal upaj kerdine, o jekh shelto, o kaver shovardeshto, pale o kaver trandavar majbut.
Kas si kan, te ashunelles!”
Kothe geline leste leske sityarde haj pushline lestar: „Sostar ande paraboli des lende duma?”
Voj kado phendas lenge palpale: „Ke tumenge davadyilas, te pinzharen le rajune themeske tajni, ba lenge chi davadyoltar.
Ke kas si, kodales inke dena haj but avla les, ba kas naj kathar kodo inke vi kodo lena so siles.
Anda kodo vorbij lende ande paraboli, ke jakhenca dikhen, ba chi dikhen, haj ashunen man, ba chi ashunen haj chi hatyaren.
Andre pherdyol pe lende le Izajasheske profecimata, kon kodo phendas:
»Ashundes ashunena maj, ba chi hatyarena,
haj dikhindes dikhena, ba chi dikhena.
Ke thulyardyilas le manushengo ilo,
penge kanenca phares ashunen,
penge jakha pale andre phandaven,
tena dikhen penge jakhenca,
ashunen penge kanenca,
hatyaren penge ilenca;
tena boldadyon karing o Del,
haj te shaj sastyarav len«.
Ba tumare jakha anandej, ke dikhen, tumare kan, ke ashunen.
Amen, phenav tumenge: but profeti haj chache doronas te dikhen, so tume dikhen, haj chi dikhline, te ashunen, so tume ashunen, ba chi ashundine.
Ashunen apol, ke so sikavel pa sumboro beshavari phendi parabola:
Kana varikon ashunel la themako alav, haj chi hatyarella, atunchi avel o nasul haj ingrel, so ande lesko ilo beshadine: kadoj kodo, so pe dromeski rig pelas.
Po barruno than pelo sumburo pale kodoj, kon ashunel o alav, haj atunchi vi ande peste xutyilelles losshasa,
ba najles rikita, haj numa unyi chasura inkrel feri. Kana anda alav kikidimata haj nashavjimata kerdyol, sigo bipatyamno kerdyol.
Mashkar le kanre pelo pale kodoj, kon ashunel o alav, ba la lumake gindura haj o xoxamno barvalipe tasavel kodo, haj frukto chi kerla.
Ande lashi phuv beshado sumburo pale kodoj, kon ashunel o alav haj vi hatyarel kodo. Pala kodo vi frukto kerla: o jekh shelto, o kaver shovardeshto, o trito trandavar majbut.”
Vi kaver paraboli phendas lenge: „Cirdel le rajosko them pe jekh manush, kon lasho sumburo beshadas ande peski phuv.
Kana sovenas le manusha, avilas lesko dushmano haj konkolyo rispisardas mashkar o dyiv haj gelastar.
Kana avri barilas o dyiv haj spiko barardas, angle avilas vi o konkolyo.
Kothe geline le slugi kaj o raj haj kodo phendine leske: „Raja! Chaches, ke tu lasho sumburo beshadan ande tyi phuv? Atunchi kathar si ande leste o konkolyo?”
Kodo phendas lenge palpale: „Dushmano manush kerdas kado.” Le slugi pe kado pushline lestar: „Kames, dore, te zhastar, haj avri te kidasles anda leste?”
Ba voj kado phendas: „Na, ke shajke o konkolyo sar avri cirden, kade avri shaj cirden vi o dyiv.
Muken soldujen jekharsa te baron kethanes zhikaj o kosipe. Kana pale avla o kosipe pheno le butyarenge: »Kiden maj anglal kethane o konkolyo haj phandenle ando snopo, te phabarenle. O dyiv pale kiden kethane ande muro sino.«”
Vi kaver parabola phendas lenge: „Anel le rajosko them po sinap sumburo, saves jekh manush xutyildas, haj beshadasles ande peski phuv.
Kado chaches majcino si kathar sako sumburo, ba kana opre barol, majbaro avla kathar kavera beshavjimata. Kasht avla anda leste, kade aven le chereske chiriklya, haj mashkar leske kranzhi kulybosarena”.
Pala kodo jekh kaver parabola phendas lenge: „Cirdel le rajosko them po kamiripe, saves jekh romnyi xutyildas, haj andre hamisardasles ande trin rolya aro, zhikaj chi phuklyilas sa.”
Sa kadala o Jezush ande paraboli vorboisardas le bute manushenge. Bi parabolicka khanchi chi phenelas lenge,
ke andre te pherdyol so e profeta phendas:
„Pe paraboli putrav mure vusht,
avri phenav zhikathar la lumako kerdyipe
garade butya”.
Atunchi bishaldas le manushen haj khere gelas. Leske sityarde kothe geline leste haj kodo phendine: „Phen avri amenge e paraboli so pa konkolyo vorbisardan amenge!”
Voj kado phendas lenge: „Kon o lasho sumburo beshavel, kodo le Manushesko Shavo si.
E plugasli phuv e luma si, o lasho sumburo le themeske shavej, o konkolyo pale le nasuleske shavej.
O dushmano, kon beshadasles, o beng si, o kosipe la lumako agor, le butyara pale le andyelaj.
Sar le konkolyos kethane kiden haj ande jag shudenles, kade avla vi pe lumako agor:
le Manushesko Shavo bishavela peske andyelon, kodal kehane kiden ande lesko them sakone bidan, haj kodalen kon nasulimata keren,
haj andre shudena len ande jagasli bov. Avla kothe rovjipe haj dand kircpe.
Atunchi le chache ablyona ande penge Dadesko them, sar o kham. Kas kan si, te ashunelles!
Anel le rajosko them pe avucija so ande plugasli phuv garadine. Jekh manush rakhlasles, haj pale garadasles, pala kodo ande peski bari lossh, gelastar haj sakofalo bikindas so sasles, haj kindas e plugasli phuv.
Anel le rajosko them po biznisari manush, kon shukarone bisora rodelas.
Kana arakhlas jekh bisori, so but kerelas, gelastar, bikindas sakofalo so feri sasles, haj kindas kodo.
Cirdel le rajosko them pe kodo xudro so ande mara shuden, haj kethane xutyildas bute falongire mashen.
Kana pherdyilas, opre cirdineles pe dolma, tele beshline, haj le lashen ande vasura kidine kethane, le nasula pale avri shudine.
Kade avla vi pe lumako agor. Le andyela avri zhana, le nasulen avri alosarena kathar le lashe,
haj andre shudenalen ando jagaslo bov. Avla kothe rovjimata haj dad kircipe.
Hatyardine sa kadala?” Kodo phendine leske: „Ova”
Voj pale kodo phendas lenge: „Kade apol sakono iskiritori, kon pinzhardoj ande rajosko them, cirdel kaj kheresko raj, kon anda peski avucija dulmutano haj nyevo anel angle.”
Pelaspe apol, ke kana o Jezush andre agurutnisardas kadal paraboli, gelastar kothar.
Pala kodo gelastar ande pesko gav, haj sityarelas len ande pengi zhinagoga, kade, ke bari dikhline pe leste: „Kathar si kadales kasavo platnikipe haj chudimata?
Na le kashtaresko shavoj kado? Leska da, na Marijake anavaren, leske phralen pale Jakab, Jozhef, Simon thaj Judasheske?
Naj kathe amende leske intrega phenya? Kathar las apol sa kado?”
Haj xolyajline pe leste. O Jezush pale kado phendas lenge: „Chi dikhen tele le profetas, feri ande lesko them haj ande lesko kher.”
China chi kerdas kothe but chudimata anda lengo bi patyamnipe.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly