capitolul 8
Kana pale tele avilas pa plaj, but manusha avile pala leste.
Haj aketa, kothe avilas jekh lepralo, changa das angla leste, haj kodo phendas: „Raja, te kames, shaj uzhares man!”
O Jezush avri lunzhardas pesko vast, leste reslas, haj kade das duma: „Kamav, av uzho!” Pe kado kuko atunchi uzho kerdyilas kathar e lepra.
Atunchi o Jezush kodo phendas leske: „Lesama, khanyikaske na vorbin pa kado, ba zha haj sikav tut le rashajeske haj inbisar opre dimata, so o Mozesh vladisardas, po chacharipe lenge.”
Kana pale andre gelas ando Kafarnaumo, kothe gelas leste jekh shelari, haj mangelas les:
„Raja, muri sluga ande muro kher pashjol bi mishkisardes, haj zurales bare dukha siles.”
Kodo phendas leske: „Zhav haj sastyarav les.”
Ba o shelari kade das palpale duma: „Raja, chi som dosta, ke ande muro kher te aves, ba numa jekha vorbasa phen, haj sastyol muri sluga.
Ke vi me tala saktimo inkerdo manush som, telalutne ketani slugin vi mange, haj kodo te pheno jekheske: »Zha!«, zhaltar, bake le kavereske »Av«, kothe avel, mure slugaske pale: »Ker kado«, kerelles.”
Kado ashundes o Jezush bari dikhlas, haj kado phendas le manushenge, kon lesa inkrenas: „Amen, phenav tumenge: ando Izrael chi arakhlom kabor patyape khanyikaste.
Phenav tumenge: But zhene avna pa oriento haj pa okidento, haj vatra malavena le Abrahamosa haj le Izhakosa haj le Jakobosa ande rajosko them.
Le themeske shaven pale avri shudena ande avralutni tunyarikimata. Avla kothe rovjipe haj dand kircipe!”
Pala kado o Jezush kade das duma kaj o shelari: „Zha, haj t«avel kade, sar patyajlan.” Haj sastyilas leski sluga ande kodo chaso.
Kana pala kado o Jezush andre gelas ande Peteresko kher, dikhelas, ke kodaleski sokra pashjol haj nasvali si.
Kaj lako vast reslas, pe soste mukhlas la o nasvalipe. Opre ushtyilas haj opre slugisardas leske.
Kana andre ratyilas, kothe andine leste bute bengale manushen. Avri nashadas peska vorbasa le duhon, kodalen pale kas varisoske dukha sas, sastyardas,
ke kade andre te pherdyon, so o Izajash profeta phendas:
»Voj amare slabimata pe peste las,
haj amare nasvalimata phiravelas«
Kana dikhlas, ke soske but manusha len les krujal, kodo vladisardas te zhan perdal pe kaver dolma.
Atunchi kothe gelas leste jekh iskiritori, haj kodo phendas leske: „Maistro, zhav pala tute, zhikaj feri zhas.”
O Jezush kado phendas leske palpale: „Le hilpan sile gropa, le chereske chiriklyan pale kujbo sile, ba le Manusheske Shaveske naj kaj tele te shol pesko shero.”
Mashkar leske sityarde jekh pale kado manglas lestar: „Raja, mukh mange majanglal te zhavtar, haj te shaj praxosarav mure dades.”
Ba o Jezush kodo phendas palpale leske: „Av pala mande, mukh pe mule, te praxon penge mulen.”
Kana andre hulyisardas ando bero, kade kerdine vi leske sityarde.
Haj aketa, kasavo baro tufano kerdyilas pe mara, ke ando bero andre marenas le plemeni. Voj pale sovelas.
Kothe aviline haj opre ushtyadine les: „Raja, muntusar amen, ke xasajvas!”
Voj kodo phendas lenge: „Sostar sanle daramne, tume cine patyamne?” Pala kodo opre tordyilas, duma das pe balvaja haj pe mara, haj baro pachipe kerdyilas.
Le manusha pale bari dikhline haj kade denas duma: „Kon si kado, ke inke vi le balvaja haj vi e mara mukelpe leske?”
Kana perdal resline pe kaver dolma, pe gadarenge phuva, angla leste avile duj bengale. Anda murmuntura aviline avri, anda kado khonyik chi tromalas pe kodo drom te phirel.
Haj kodal aketa, kade cipinas: „So grizha si amen tute, Devlesko Shavo? Anda kodo avilan kathe, ke angla e vrama te dukhares amen?”
Dur lendar jekh balengo kethanipe sas pe mal.
Le beng mangenas les: „Avri te nashavesa amen, bishal amen ande balengo kethanipe.”
Kodo phendas lenge: „Zhantar.” Kodal avri geline, haj andre huraldine ande balende. Haj aketa, tele nashlas o intrego kethanipe, tele pa mal ande mara, haj tasadyiline ando paji.
Le balara pale nashletar ando foro, haj ingerdine e viaca, ke so pelaspe le bengalenca.
Haj aketa, o intrego foro avri avilas angla o Jezush. Kana dikhline les, mangenas les, ke te zhaltar pe kaver phuva anda lengi granica.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly