capitolul 25
Atunchi anela le rajosko them pe desh sunci sheja, kon xutyildine penge phabarde haj avri geline angla piramno.
Panzh mashkar lende chaladora sas panzh pale godyavera.
Ke le chalade kana opre line penge phabarde, chi line pende uloj.
Ba le godyavera penge phabardenca kethane vi uloj ingerdine penca ande penge vasura.
Ke o piramno chi reslas pe vramate, savorazhene lindrale kerdyiline haj sutetar.
Ba dopash ratyi cipipe ashundyolas: »Kathej o piramno, aven avri angla leste!«
Atunchi le sunci sheja savora zhene opreushtyiline haj lashardine penge phabarden.
Le chalade atunchi kade dine duma kaj le godyavera: »Den amen anda tumaro uloj, ke avri soventar amare phabarde.«
Le godyavera kado phendine lenge: »Dore tena avel dosta chi amenge, chi tumenge, zhan barem kaj le biknara haj kinen tumenge.«
Zhikaj kodola gelinetar te kinen uloj, reslas o piramno, haj kon gata sasle, andre geline lesa po colaxaripe. O vudar andre phandadine.
Maj palal resline vi le majbut sunci sheja. Kodo phendine: »Raja, Raja! Puter avri amenge!
Ba voj kado phendas palpale: »Amen, phenav tumenge: chi pinzharav tumen.«
Aven apol samalinde, ke chi pinzharen chi o dyes, chi o chaso.
Kade avla, sar kana jekh manush kodo kamlas, ke pe strene phuva te zhaltar. Akhardas peske slugan, haj perdal das lenge pesko barvalipe.
Le jekhes panzh talentumo das, le kaveres dujen, le tritos pale jekh, savorenge sar pelaspe: haj gelastar pe strene phuva. Atunchi sigo
gelastar kodo, kon panzh talentumo las, andre pashjardas kodalen, haj rodas inke panzhen.
Zhikade vi kodo, kon dujen las, rodas inke dujen.
Ba kodo kon jekh las, gelastar, ande phuv hunades garadas peske rajeske love.
Pala but vrama khere avilas kadale slugango raj, haj oprepushlas len.
Angle tordyilas atunchi kodo, kon panzh talenumura las, haj andas inke panzhe kavera talentumura, haj kade das duma: »Raja, panzh talentumura dan man, dikh, kavera panzh rodem inke pe lende.«
Lesko raj kodo phendas leske: »Mishtoj, lasho haj chachi sluga san! Ando cino chacho sanas, abakanak but mukav pe tute: zha andre ande tye rajeski lossh.«
Pala kado avilas vi kodo, kon le duj talentumura las, haj kade das duma: »Raja, duj talentumura dan man, dikh, inke duj talentumura rodem pe lende.«
Lesko raj kado phendas leske: »Mishtoj, lasho haj chachi sluga san, ando cino chacho sanas, abakanak but mukav pe tute: zha andre ande tye rajeski lossh.«
Palunes kothe avilas vi kodo kon jekh talentumo las, haj kado phendas: »Raja, zhanav pa tute, ke capeno manush san, kosis, kaj chi beshadan, haj andre kides vi kothar kaj chi ropnardan.
Ke daros tutar, gelomtar haj garadom tyo talentumo ande phuv. Aketa, so tyiro si!
Lesko raj kado phendas leske palpale: »Tu nasul haj bi butyako sluga! Zhanglan, ke kosij kaj chi beshadom haj kethane kidav kothar, kaj chi ropnardom.
Haj zhianda kado trubusardino mure love te des kothe le love opre paruvarange, ke kana khere avav, butardes te lav palpale so muroj.
Len apol lestar o talentumo haj denles kodaleske, kas desh talentumura si!
Ke sa kodaleske, kas si, inke dena haj mishto trajila. Kathar kodo kas pale naj, inke vi kodo len, so siles.
Le khanchikerde slugas pale shudenles avri po avralutno tunyarikipe! Avla kothe rovjipe haj dand kircipe!«
Kana le Manushesko Shavo avelatar ande pesko luvudyipe, haj lesa kethanes le andyela savora zhene, atunchi tele beshela pe pesko luvudyaslo iskamin.
Kethane kidena angla leste sakone popularon, voj pale alosarela len jekhavrestar, sar kana o malyari alosarel le bakren kathar le busnya.
Le bakren pe peski chachi rig tordyarela, le busnyan pale po stungo rig.
Atunchi o kraj kade dela duma kaj kodala, kon pe chachi rig tordyon: »Aventar, mure Dadeske ashtyilime, len perdal le themes, so tumenge keradyilas zhikathar la lumako kerdyipe.
Ke bokhajlom haj dine man te xav, trushajlom haj dine man te pav, streno somas haj andre svagardine man,
nango somas haj opreurade man, nasvalo somas haj aviline te dikhen man, phanglo somas haj aviline mande.«
Atunchi le chache pushena lestar: »Raja, kana dikhlam tut te bokhajves, haj dam tut te xas, bake te trushajves haj dam tut te pes?
Kana dikhlam tut sar strenos, haj andre xutyildam tut, bake nanges, haj opreuradam tut?
Kana dikhlam tut nasvales bake phangles haj gelamtar tute?«
O kraj kade dela vorba palpale lenge: »Amen, phenav tumenge: kana mashkar mure majcine phral kerde kado jekheske, mange kerdineles.«
Pala kado kon pe leski stungo rig tordyon, kado phenela: »Zhantar mandar, tume armajasle, pe sagutni jag, so le bengeske haj leske andyelonge kerdyilas.
Ke bokhajlom haj chi dine man te xav, trushajlom haj chi dine man te pav,
streno somas haj chi svagardine man andre, nango somas haj chi urade man opre, nasvalo somas haj phanglo, haj ch«aviline te dikhen man.«
Pe kado vi kodola pushena: »Raja, kana dikhlam tut te bo-khajves bake trushajves, sar strenes bake nanges, nasvales bake phangles, haj chi slugisardam tuke?«
Atunchi voj kade dela vorba palpale lenge: »Amen, phenav tumenge: Kana chi kerdine kado mashkar kadal majcine jekheske, mange chi kerdineles.«
Haj zhanatar kadal pe sagutne dukha, le chache pale po sagutno trajo.”
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly