capitolul 11
Pecisajlas apol, ke kana agorutnisardas o Jezush peske deshuduje sityardengo sityaripe, gelastar kothar, te viacarel haj te sityarel o alav ande lenge forura.
Kana o Janosh pa Kristoske trabi ashundas ande robija, bishaldas leste peske sityarden
haj pushlas lestar: „Tu san o Avlosardo bake kaveres te zhukaras?”
O Jezush kado phendas palpale lenge: „Zhan, ingren le Janosheske e viaca, so ashunen haj dikhen:
Le korre dikhen, le bange phiren, le leprale uzhosajven, le kashuke ashunen, le mule opretrajisajven, le chorre pale viacaren o evangeliumo.
Anandoj, kon chi kordolardyol ande mande.”
Kana kodal gelinetar, o Jezush kade las te vorbil le manushenge pa Janosh: „Sostar zhan avri, so kamen te dikhen ande pusta? Kathar balval phurdini trestija?
Bake so kamline te dikhen, kana avri geline? Ande rajkane gada urade manushes? Aketa, kon rajkane gada phiraven, ande krajenge khera beshen.
Bake so kamen te dikhen, kana avri zhan? Profetas? Ova, phenav tumenge, vi kathar e profeta maj baro.
Voj si kodo, pa kaste iskirime si:
»Aketa, bishalav mure legataros angla tute,
kon lasharela angla tute tyo drom«.
Amen, phenav tumenge: mashkar kodal kas romnyi andas pe luma, naj maj baro, kathar o Bolari Janosh. Ba kon o majcino si ande rajosko them, kodo maj baroj lestar.
Le rajosko them zhikathar le Bolare Janosheski vrama zhikaj akanutni sila dukharel, haj le silakire len kodo pende.
Le sagutne profeti haj e kris zhikaj o Janosh pa kado profecisardas:
Haj te kamen les te hatyaren: ova, voj si o Illesh, kon aveltar.
Kas si kan, te ashunel les.
Kaste te pasharav kadale generaciovos? Pe kodal shavora anen, kon ando foro beshen, cipen le majbutenge,
haj phenen:
»Bashadam tumenge, ba chi kheldine,
rovjimaski gilyi gilyabadam, ba chi rovenas.«
Ke avilastar o Janosh, chi xalas, haj chi pelas, haj kodo phendine: »Beng si les!«
Avilastar le Manushesko Shavo, xal thaj pel, haj kodo phenen: »Aketa, o bokshindo thaj matyakerno manush, le financongo haj le bezexaslengo vortakoj!« Ba o platnikipe peske kerdyimatasa chacharipe arakhel.”
Pala kodo le forura, ande save leske majbut chudimata pecisajline, las tele te phenel, ke chi boldepe karing o Del:
„Jaj tuke, Korozain! Jaj tuke, Betsaida! Ke e chudimata, so tumende pecisajline, ando Tirus haj Sidon te pecisajlinesas, aba dulmut patyanas, ande gonekerde gada haj ushareste.
Ba phenav tumenge: Le Tiruses haj le Sidones, majbut zheja avlale pe krisako dyes, sar tumenge.
Haj tu, Kafarnaum! Dore zhikaj o cheri vazdadyos? Tele hurasa ande telalutni luma! Ke e chudimata, save tute pecisajline, ande Sodoma te pecisardyilinesas, atunchi ashilinesas zhikaj kado dyes.
Ba phenav tumenge: la Sodomake phuvake maj ushoro zheja avla pe krisarimasko dyes, sar tuke.”
Ande kodi vrama kade das duma o Jezush: „Ashtyilisarav tut muro Dad, le rajosko haj la phuvako raj, ke garadan kadal angla platnika haj godyavera, haj avri sikadan le cinenge.
Ova, muro Dad, kade fajlas kado tuke!
Sakofalo mange das perdal muro Dad, haj khonyik chi pinzharel le dades, feri o Dad, haj chi le Dades chi pinzharel khonyik, feri o shavo, haj kaske o shavo avri kamel te zhanavelles.
Aven mande savorazhene, kon khine sanle, haj pharimata phiraven, haj me oprezurarav tumen.
Len pe tumende muro pharipe, haj sityon mandar, ke blindo som haj lashe ilesko – haj pacha arakhen tumare duhoske.
Ke muro pharipe gugloj haj ushoroj.”
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly